Chris Evans olusuddemu 'Bw'olonda akusaana' abadigize ne babinuka masejjere e Mukono
ABAGALANA beeraze amapenzi eno nga bwe bafuuweta ebbidde omuyimbi w'ennyimba z'omukwano Chris Evans Kaweesi bwe yasuddemu akayimba ka 'Bw'olonda akusaana' mu kivvulu kye kye yatuuma 'Another Lover Bikalubye'.
Chris Evans olusuddemu 'Bw'olonda akusaana' abadigize ne babinuka masejjere e Mukono
By Lawrence Mukasa
Journalists @New Vision
Evans yasoose Lukaya ku woteeri ya Nana gye yakubidde abadigize omuziki gwe gwonna okuva ku bukadde bwe yasooka era eno eyaliko omubaka wa Makindye Ssabagabo Kigozi Ssajjalyabeene saako ne Minisita w'obutebenkevu Vicent Bamulangaki Ssempijja baalumbye Evans ku siteegi ne basanyusa abadigize, era wano Ssempijja we yasinzidde ne yeebaza Evans olw'okuyiiyanga ennyimba ezinyuma ate n'obutava ku mulamwa nga abayimbi abalala n'amusaba obutaddirira.
Evans bwe yavudde e Lukaya n'alumba abantu b'e Mukono ku 'Summer gardens' era eno abaagalana bazze mu bungi ne batandiika okweraga omukwano mu ngeri y'okulumya abatazze na baabwe era bakira buli kayimba ka Evans akoomukwano k'asuulamu ng'abamu basituka ne batandika okwenyiga omunyigo ate abalala ne basunda ebbidde nga balinga abawendule.
Minisita Ssempijja mu kivvulu kya Chris Evans
