Engeri gy'oyongera omutindo ku muceere oguli awafunda n'ofunamu ekiwera

CHARLES Ssali omuceere gw'alimira awafunda mu lutobazzi oluliraanye ekibuga Kampala afubye okulaba ng'agwongerako omutindo okusobola okufunamu ekisingawo. 

Ekibangirizi ky'ekitundu kya yiika Ssali kumpi buli mwaka akungulamu omuceere ogusukka mu kkiro 600. Wadde ng’abalimi bangi enkuba ebadde efudemba bagyekokkola olw'okutta n'okuvunza ebirime, ye ate agiganyuddwamu.

Agamba nti, oluvannyuma lw'okulimira omuceere mu kibangirizi ky'olutobazzi luno okumala ekiseera, yali asazeewo asooke aguwummuzeemu asimbewo kasooli.

Nga yaakamala okukabalawo,  omusiri gwe yali yaakamala okukungulamu omuceere n’okufuuyira, enkuba eyatonnya obutasalako yamulemesa okusimba kasooli mu budde nga bwe yali ateeseteese.

Waayita ekiseera kitono ensigo z'omuceere ezaakunkumuka mu makungula zaatandika okwemeza zokka olwo n’asalawo azzeewo omuceere.

“Ekibangirizi ky'ekitundu kya yiika e Zzana mu munisipaali ya Makindye-Ssaabagabo mu Wakiso bulijjo mbadde nkikungulamu kkiro z'omuceere ekika kya Super nga 500 okudda waggulu wabula ku mulundi guno nsuubira okuweza kkiro nga 700 n'okusingawo kuba gwabaze nnyo.

Natandiikiriza okukungula era we gunaggwaayo nga ngutwala ku kyuma ekigukubako akakuta mu nkola y'okugwongerako omutindo okusobola okufunamu ekiwera.

Omuceere guno ngupakira mu ppaketi ezirabika obulungi okuva ku ya kkiro emu n’okudda waggulu.

Ku myezi etaano n’omukaaga, mbeera nkungula ate ng'akatale weekali. Obukuta obuggyibwa ku muceere nabwo mbutunda mu ngeri ya njawulo kuba butabikibwa mu
mmere y'ebisolo oba enkoko.

Olw'okuba omusiri gw'omuceere guno si munene nnyo, byonna nze mbyekolera naddala mu kukoola, okukungula n'okutangira ebinyonyi.