Purezidenti arabwire abeebembezi ba Amuru ahaby’obutegyeki bibi.
Purezidenti Museveni nabwo ahabwire abeebembezi okureeba ngu abantu abu barikwebembera bagira entaasya ehamire omu maka gaabo.
Purezidenti Yoweri Museveni arikubuganaho abeebembezi b'omu disiturikiti eya Amuru aha maka g'obwa Purezidenti, Entebbe. Photos by PPU.
N’ebya Beth Akatukunda
AMURU
Purezidenti Yoweri Museveni nyomwebazyo ebiro 07/11/2023 abugaineho kandi yaganiraho n’abeebembezi kuruga omu disiturikiti eya Amuru aha maka g’obwa Purezidenti, Entebbe.
Purezidenti hamwe n’abeebembezi ababaire barimu ceeyamaani wa disiturikti Michael Lakony n’aba kansara ba disiturikiti baganiire aha nshonga z’entunguuka n’ezindi nshonga ezirikuteganisa disiturikiti egi.
Omu rukiiko oru, Purezidenti Museveni ahabwire abeebembezi okutaho obury kureeba ngu abantu abu barikwebembera bagira entaasya ehamire kubaasa kurwanisa obworo n’okutunguura emiturire yaabo.
Purezidenti Museveni arikubuganaho abeebembezi ba Amuru aha maka g'obwa Purezidenti, Entebbe kuganiira ahanshonga eziri omu disiturikiti eya Amuru aharwakabiri, ebiro 07/11/2023.
Purezidenti Museveni agambiire abeebembezi ngu entaasya y’omu maka nebaasa kuhikirira kurabira omu kwejumbira omu buhingi obw’esente.
Purezidenti ayongiire yaashaba abantu b’omu disiturikiti eya Amuru kushagika puroguraamu ya gavumenti eya Parish Development Model (PDM).
Abeebembezi ba disiturikiti eya Amuru barikubuganaho Purezidenti Yoweri Museveni aha maka g'obwa Purezidenti, Entebbe Orwakabiri ebiro 07/11/2023.
Naagira ngu nk’oku hariho esente za PDM, abahingi baine kureeba ngu bayejumbira omu nkora ya Purezidenti eya hiika 4 ‘four-acre model farm’ hiika y’okubanza kuhingaho omwani, eya kabiri kutaho ebijuma nk’emiyembe nainga emicungwa, hiika ya kashatu kuhingaho ebinyatsi by’ente kandi eya kana kuhingaho ebihingwa eby’okurya hamwe n’okukora purogyekiti ezindi nk’okuriisa enkoko, empunu hamwe n’okuriisa eby’enyanja.
Purezidenti nabwo ashabire abeebembezi okukora aha bizibu ebindi ebikiri omu kitongore ky’eby’obwegyese, eby’amagara, enguuto hamwe n’ebindi bwanyima y’okukora aha kizibu ky’obworo n’eby’obutegyeki bibi.
Aha nshonga y’’okutungira amataka ag’omu disiturikiti ebyapa, Museveni agizire ngu eki n’ekiteekateeko kirungi.
Purezidenti Museveni ayongiire yaraganisa okushagika ba Kansara abataine fiizi ‘Tution fees’ kandi barikwenda kumarira okushoma univasite.
Ahaireyo amabaati 2,000 kuhunduuza amashomero g’omu disiturikiti eya Amuru agari omu mbeera mbi.
Aha rubaju rwe, Lakony asiimire Purezidenti Museveni ahabw’obwebembezi burungi n’okureebera hare oburetsireho entunguuka omu disiturikiti eya Amuru na Uganda yoona okutwariza hamwe.
#WestUpdates