85% y’abanya-Uganda tibarikwesiga abany’eishengyero baabo- Rupoota.

N’ebya Ivan Tsebeni

Ebicweka 85 ahari 100 by’abanya-Uganda tibarikwesiga abany’eishengyero baabo ahabw’okuba abaingi enshonga ezi barikuhayo omu Paramenti n’ezaabo nk’abantu, okurugiirira aha kucondooza okukozirwe ab'ekitongore ekya Afrobarometer.

Eki nikimanyisa ngu ebicweka 15 ahari 100 bya miriyooni 45.9 z’abanya-Uganda nibo bonka barikwesiga abany’ishengyero.

Rupoota niyo emwe neyoreka ngu omu mwaka gwa 2024, ebicweka 25 ahari 100 by’abantu ba buraijo bagizire ngu ba Kansara baabo ba disturikiti nibo barikuhikirira abateezi baabo b’akaruuru bakababuuza enshonga zaabo kurugira kimwe aha bicweka 40 ahari 100 by’abantu ababaire nibabuzibwa aha nshonga ezirikubateganisa omu mwaka gwa 2005.

Rupoota neyogyera eyoreka ngu abanya-Uganda nibagira ngu okutunga obuheereza oburi aha mutindo omu bitongore nka eky’eby’amagara, eby’obwegyese, amashanyarazi n’okutunga amaizi marungi kikiri ekizibu ky’amaani hakurataho okutunga entaasya n’enguuto.

Eky’okutangaaza, rupoota nabwo neyoreka ngu ebicweka 62 ahari 100 by’abanya-Uganda omu mwaka gwa 2021, bakagira ngu abanyabutegyeki hamwe n’abeebembezi b’ebigombe by’obutegyeki nibekorera ebyabo nk’abantu okukira okukorera abantu ababateire omu ntebe ezibarimu.

Arikutongozaho ebirugire omu kucondooza oku ahari Africana Hotel omuri Kampala nyomwebazyo, ebiro 02.7.2024, Francis Kibirige- omucondooza omu kitongore ekya Afrobarometer omu Uganda agizire ngu abanya-Uganda baingi tibarikwikiririza omu beebembezi baabo.

Nakyoreka ngu abanya-Uganda abaingi abaabuziibwe omu kucondooza oku baikiriize ngu hariho ekyetengo ky’abeebembezi kukora n’amaani n’okukwatanisa n’abateezi baabo b’akaruuru ahabw’okwenda kugaruza obwesigye omu bantu.

Arikugamba aha kucondooza oku, beitu hoona, Emmanuel Dombo-  Dayirekita w’eby’okumanyisana omu NRM naagira ngu abany’ishengyero nibo bashemereire kujumirirwa ahabw’okuba nibo barikuba nibasharamu oku esente z’eihanga ziine kukoresibwa.

#WestUpdates
#RadioWestAt25