Uganda esanze Misiri ku 'quarter' z'ekikopo ky'Afrika
OMUTENDESI wa ttiimu y’eggwanga eya Volleyball abasajja Shilla Omuriwe Buyondo, yeekwasizza baddifiri okusaliriza mu nsiike eyagaddewo ebibinja bwe baakubiddwa Rwanda abategesi 3-2 ne basubwa okumalira ku ntikko.
Uganda esanze Misiri ku 'quarter' z'ekikopo ky'Afrika
By Bukedde Omusunsuzi
Journalists @NewVision
2021 MEN’S AFRICAN VOLLEYBALL CHAMPIONSHIP
Eggulo (Lwakutaano)
Burkina Faso 1-3 Burundi
Kenya 3-0 Tanzania
S. Sudan 0-3 Tunisia
Ethiopia 1-3 Nigeria
Rwanda 3-2 Uganda
Misiri 3-1 Morocco
Leero(Lwamukaaga) mu ‘quarter’
Cameroon – Nigeria (5:00)
Tunisia – DRC (7:00)
Misiri – Uganda (9:00)
Rwanda – Morocco (11:00)
Eggulo Lwakutaano (September 10,2021), ‘Volleyball Cranes’ yakubiddwa Rwanda 3-2 (25-15, 21-25, 23-25, 25-11, 15-9) mu nsiike eyabadde ey’okufa n’okuwona nga ttiimu zombi zirwanira okumalira ku ntikko y’ekibinja A oluvannyuma lw’okugyesogga nga basibaganye ku wiini bbiri buli omu.
20210907 220132
Uganda yawanguddwa oluzannya olusooka(25-15), yakomyewo n’amaanyi n’ewangula enzannya ebbiri ezazzeeko(25-21, 25-23) wabula ebintu byagitabuseeko mu nzannya ezassalessale ebbiri ezisembayo Rwanda bwe yabakubye (25-11 ne 15-9).
Wabula omutendesi Omuriwe teyamatidde na mutindo gwa baddifiri gwe baayolesezza mu nzannya ezasembyeyo bbiri, ng’alumiriza nti baalaze kyekubiira eri Rwanda abategesi okubawanguza ensiike eno.
“Uganda twazannye bulungi era twabadde n’enkizo okuwangula naye oluvannyuma lw’okuwangula enzannya ebbiri mu muzannyo baddifiri batandise okulaga oludda nga tebaagala Rwanda abategesi kuswala, naye olutalo terunaggwa twagala kufiira ku Misiri okweyongerayo ku ‘Semi’, Omuriwe bwe yeemulugunyizza.
Leero Lwamukaaga (September 11, 2021), Uganda ekomyewo mu nsiike okulwanira ‘Semi’ ng’ezannya Misiri abaakubye Morocco 3-1 ne bamalira ku ntikko y’ekibinja D.