UCU ekaabizza Busitema amaziga mu liigi ya yunivasite

Eggulo mu liigi ya yunivasite

UCU 7-1 Busitema

Leero (October 4, 2023)

MUBS – IUIU, Nakawa

Abawagizi ba yunivasite ya Busitema baatunudde ebiriroliro oluvannyuma lwa UCU okubasangulizaako ettoomi n’ebakuba ggoolo 7-1 mu Pepsi University Football League.

Busitema yatandise na maanyi mu kitundu ekisooka bwe kyaweddeko nga bakoze ennumba ez’obulabe 7 ku ggoolo ya UCU nga wadde bannyinimu baabadde bakulembedde omupiira guno (1-0).

Baakomyewo ku ntandikwa y’ekitundu ekyokubiri nga baswakidde nga enswera ne bafuna ggoolo ey’ekyenkanyi nga bayita mu Joel Okiria wabula wano baabadde nga abakubye ejjinja mu njuki za UCU bwe yabatabukidde n’ebongera ggoolo ez’okumu kumu 6 okutuusa ddiifiri bwe yabataasizza omupiira n’aguwunzika.

omutendesi Abdulnoor Musisi ng'asirisa Emmanuel Mukakanya.

Kapiteeni wa UCU, Geoffrey Gaganga yakubye ggoolo eyayuzizza akatimba ne Peter Kyomuhendo buli omu yateebye ggoolo ssatu mu mupiira guno wamu ne Isaac Ofoyirwoth be baakaabizza Busitema amaziga agajjulujjulu.

Bakira omutendesi wa Busitema, Abdulnoor Musisi agezaako okugumya abazannyi naye ng’amaziga gabayitamu ku kisaawe kya UCU e Mukono.

“Abazannyi bange abasinga bali mu mwaka gusooka ku yunivasite, eno ye sizoni yaabwe esooka okuloza ku bukambwe bwa liigi ya yunivasite wabula ng’enda kulwana okutereeza obwongo bwabwe basobola okuguma ate tuwangule emipiira egiddako,” Musisi bwe yategeezezza.

Wabula Collins Ahumuza atendeka UCU ye yayongedde kuwera ng bwe batagenda kuddiriza naddala ku mipiira gy’awaka kuba abazannyi abasobola okuteeba babalina mu bungi.

Guno gwabadde mupiira gwa ttiimu zombi ogwokubiri mu kibinja D ekikulembeddwa UCU n’obubonero 6 mu mipiira ebiri, Busitema erina busatu ate Kumi ne Kampala International University (KIU) tebalinaayo kabonero.