Gabriel Jesus yeekebejjeddwa abasawo ba Arsenal

Gabriel Jesus mutaka mu kibuga London okugezesebwa abasawo ba Arsenal gye bagenda okumwekebejjeza oluvannyuma yeegatte ku ttiimu eyo mu butongole. Amawulire gaategeezezza gye buvuddeko nti Arsenal yakkirizza okusasula obukadde bwa pawundi 45, Man City bwe yabadde eyagala mu muzannyi ono era n’omusaala gwe baagukkaanyizzaako. Kigambibwa nti Jesus waakufuna emitwalo gya pawundi 19 buli wiiki nga waakufuuka omuzannyi owookuna Arsenal gwe yaakakansa mu katale k’abazannyi kano. Marquinhos, Matt Turner ne Fabio Vieira be bamu ku bazannyi abaakansiddwa Arsenal. Jesus waakudda mu bigere bya Pierre Aubameyang eyayabulira Arsenal mu katale k’abazannyi aka January era agenda kuvuganya ku nnamba ne Eddie Nketiah eyazzizza obuggya endagaano ne ttiimu eno.