Chandiga ne Mutesi bawangudde empaka za Nile Special Pool

Fayinolo ya Nile Special Pool:

Abasajja:

Ceaser Chandiga 9-4 Rashid Wagaba

Abakazi:

Rashida Mutesi 7-4 Marion Kisakye

Abazannyi ba pool, Ceaser Chandiga mu basajja ne Rashida Mutesi be bannantamegwanb’omuzannyo guno mu 2025 be baasitukidde mu mpaka za Nile Special National Open Pool Championships mu fayinolo ezaazannyiddwa mu Lugogo Indoor Arena ku Ssande ekiro.

Chandiga eyeeyita Scopion yamezze Rashid Wagama amanyiddwa nga Dog City kyokka nga bombi ba kiraabu ya Upper Volta ku bugoba 9-4.

Mu bakazi, Mutesi yamezze Marion Kisakye eyagiwangula omwaka oguwedde ku bugoba 7-4.

Abazannyi baalemeddwa okumenyawo akalombolombo k’obutabaawo yali neddizza bwa nnantameggwa bwa mpaka za National Open zino.

Mansoor Bwanika eyagiwangula mmotoka omwaka oguwedde yakubiddwa ku luzannya olwa 32 wabula ng’omukazi Marion Kisakye ‘Anka’ kata akole ekitakolwanga okubweddiza kyokka n’akubwa Rashida Mutesi ku fayinolo ku bugoba 7-4.

Wabula Ceaser Chandiga (Scopion) yafuuse omuzannyi owokusatu okuwangula mmotoka ya Nile Special eno omulindi ogw’okubiri nga yasooka mu 2023 era yeegasse ku Fahad Ssewankambo ne Mansoor Bwanina eyabadde ayagala ey’okusatu.

Ku semifinal baasoose kugyamu Ibra Ssejjemba ne Joseph Kasozi bombi aba kiraabu ya Rox Berry.

Mutesi ng'ali mu mmotoka gy'awangudde

Mu bakazi ku semifinal, Mutesi owa Mukono yagyemu yagyemu Rita Nimusiima ku peneti bwe baasibaganye 6-6 ate Kisakye n’agyamu Prosy Namuli kubugoba 6-4.

Mmotoka zino Subaru Impreza zaabakwasiddwa kitunzi wa Nile Special, Ronald Kayondo ng’ali ne pulezidenti wa Pool Association of Uganda (PAU) Bob Trubish.

Maama wa Chandiga, Lukia Zainab, mukyalawe Mercy Mundia wamu n’aba famile ate ne taata wa Mutesi Amin Kisubi baabaddewo okuwagira abaana baabwe nga bawangula mmotoka zino.

‘Ndi musanyufu okuwagula mmotoka eyokubiri eya Nile Special. Omuzannyo tegubadde mwangu wabula nagwetegekera. Obuwanguzi mbuwadde ffamile yange,” Chandiga bwe yategeezezza.

Ye Mutesi yeegasse mukuluwe Lukia Naiga eyawangula mmotoka ya 2023 era yeggyeko ekikwa nga yawangulirwa ku fayinolo ya 2018 ne 2023 (lwe yakubwa mukuluwe).

“Katonda ansangudde amaziga. Ndi musanyufu nnyo era nsiima abawagizi, abatendesi neba maneja bange bonna,” Mutesi bwe yategeezezza.

Chandiga ku mmotoka yafuniddeko ensimbi 5,000,000/= n’emmeeza ya pool ate Mutesi n’afuna sh3,000,000/= era n’emeeza ng’abawanguzi 16 mu basajja n’abakazi 8 baafunye ssente.

Chandiga ng'alaga ebikopo by'awangudde

Abazannyi abasoba mu 5,000 be beetabye mu z’okusunsulamu eza 2025 ng’abasajja 128 n’abakazi 32 be baazannye fayilono e Lugogo okusinziira ku Trubish.

“Tusiima aba Nile Special abaakagaba mmotoka 11 mu mpaka zino, bamaneja b’amakiraabu. abazannyi n’abawagizi ba pool olw’okweyongera omutindo,” Trubish bwe yategeezezza.

“Mutusanyusizza era n’omwaka ogujja tujja kuteekamu ensimbi,” kitunzi wa Nile Special, Ronald Kasumba bwe yategeezezza.

Kalenda ya pool eggalawo n’ampaka za Grand Finals nga December 27 e Mukono okusinziira ku Trubish