Omushaho akwateirwe okuragiira abarwaire kugura emibazi aheeru y’eirwariro- Kabale.
Kariisho riisho wa gavumenti, Justice Aisha Naluzze nashaba kuhabaho okukwatanisiza hamwe omu kurwanisa obushomankuzi n’oburi bw’enguzi omu eihanga.
Nicholas Tumuheki akwatsirwe kariisho riisho wa gavumenti obu abaire agiire kurambura eirwariro erikuru erya Kabale omu kyanga ekya Kigezi. Photos: Nelson Ahimbisibwe.
N’ebya Nelson Ahimbisibwe
KABALE
Kariisho riisho wa gavumenti, Justice Aisha Naluzze Batala aragiire okukwata kw’omushaho ah’eirwariro erihango erya Kabale ahabw’okugambwa kuba aragiire abarwaire kuza kugura emibazi omu Pharmacy y’omuntu buntu n’obu emibazi egyo ebaire eri ah’eirwariro eri.
Nicholas Tumuheki akwatsirwe kariisho riisho wa gavumenti obu abaire agiire kurambura eirwariro erikuru erya Kabale omu kyanga ekya Kigezi.
Kariisho riisho wa gavumenti, Justice Aisha Naluzze Batala arikurambura eirwariro erihango erya Kabale aharwakabiri ebiro 10.02.2026.
Okukwatwa kw’omushaho ogu kwizireho bwanyima y’omwe omubarwaririize ah’eirwariro eri kugambira Kariisho riisho wa gavumenti ngu mwine nyine otungire butandu tahairwe bujanjabi kandi ngu abashaho bamusindikire kugura emibazi aheeru y’eirwariro.
Justice Batala ashoboriire oku ashangire abarikwebembera eirwariro eri batakozire, abarwaire bari omu ‘emergency’ batiine orikubakoraho hamwe n’okushanga emibazi ei abashaho babaire nibaragiira abarwaire kugura aheeru y’eirwariro kugishanga eri omwibikiro ry’emibazi ah’eirwariro eri.
Kwabaire nagambaho n’abeebembezi ba Kabale, Justice Batala akyorekire ngu ofiisi ye erungire okwetomboita kwingi kw’ebikorwa by’obushomankuzi na munonga omu bukiiko oburikugaba emirimo aha disiturikiti.
Kariisho riisho wa gavumenti, Justice Aisha Naluzze Batala arikuteeza ekishushani n'abeebembezi ba Kabale omu kyanga ekya Kigezi aharwakabiri ebiro 10.02.2026.
Batala nagira ngu okwetomboita okwingi kwine akakwate n’okucupura ebihandiiko by’obwegyese, okushashura ebituga kuza kutunga omurimo n’ebindi, ebi arikugira ngu nibireteera abanya-Uganda abaine obukugu batatunga omugisha gw’okukora emirimo egyo.
Nashaba kuhabaho okukwatanisiza hamwe omu kurwanisa obushomankuzi n’oburi bw’enguzi omu eihanga.
Mukuru w’eirwariro erihango erya Kabale ow’akanya bwanya, Dr. Peter Kangwaje ashabire okusaasirwa kandi araganiise ngu obuheereza nibwija kutereezibwa.
#WestUpdates