National Drug Authority baabugana abarikukora emibazi y'ekiiraguju, Bushenyi
Omushomo ogu gwayejumbwamu abeebembezi ba disiturikiti ya Bushenyi harimu RDC Robert Atuhairwe, Ceyamaani Jaffari Basajjabalaba, DPC Okumu Aggrey, DHO hamwe na CAO
Abeebembezi ba disiturikiti ya Bushenyi, aba NDA n'abashaho omukushushani. PHOTO: Fatuma Nagudi
N'ebya Nagudi Fatumah
Nk'omuringo gumwe gw’okutunguura enkoresa n’omutindo gw’emibazi y’ekiiraguju ninga emibazi erikuruga omumiti yobuhangwa, abashaho kuruga omukitongore ekirikujunaanizibwa ahamutindo gw'emibazi omu ihanga ekya National Drug Authority baabuganaho abarikukora emibazi egi omuri Bushenyi.
Aba National Drug Authority, bayebemberwa Hajji Jamil Lutakome orikukurira abari kukora emibazi y'ekiiraguju omu ihanga kandi arikubakiikirira ahakakiiko akakuru omu NDA kandi orukiiko oru rwashutama aha Hoteeri ya JAMUGI omuri Bushenyi.
Hajji Jamil yaagira ngu nk'ekitongore, n’obujunanizibwa bwabo okureebeka ngu baatunguura emibazi egi ey'ekiraguju kandi ngu okusharamu okutaayayira abantu abarikukora emibazi egi, n'ahabw'okugira ngu eki ni kimwe omubicweka ebishangirwe ngu biine emiti erikurugamu emibazi, kandi ngu abantu n’obu baraabe nibabikoresa kwonka nibikiburamu nikwo kwenda ngu babahwere kubaasa kugitunguura bakongyera n'ahamutindo.
Omushomo ogu gwayejumbwamu abeebembezi ba disiturikiti ya Bushenyi harimu RDC Robert Atuhairwe, Ceyamaani Jaffari Basajjabalaba, DPC Okumu Aggrey, DHO hamwe na CAO kandi aba basiima ekitongore kya NDA ahabw'okurugayo okwegyesa n’okushagika emibazi y'ekiraguju ahabw'okuba tihaine muntu orikukura atakoreise mibazi egi kandi terikwetaagisa kutamu kihango kugitunga.
#WestUpdates