Museveni yashaba abanya-Uganda okwanga eby’obutegyeki eby’okubaganisamu abantu.

N’ebya Beth Akatukunda

KITGUM

Purezidenti Yoweri Kaguta Museveni yaagira ngu hariho ekyetengo kya Uganda kukwatanisa n’amahanga ga East Africa, eihanga ryaza kutunga akatare k’ebintu ebirikushohozibwa.

Purezidenti Yoweri Museveni aha kujaguza ekiro ky'okwetegyeka omu kishaayi kya Booma, omu disiturikiti eya Kitgum.

Purezidenti Museveni yagamba ebi eriizooba aha mukoro gw’ekiro ky’okwetegyeka kwa Uganda ogw’omurundi gwa 61 ogwakorerwa aha kishaayi kya Booma omu disiturikiti eya Kitgum ahansi y’omutwe “ Sustaining a united and progressive nationa, take charge of our future as a free nation,”.

Museveni yaagira ngu Uganda neshohoza ebicoori bingi, enyama, amate, omwani, ebitookye n’ebindi beitu bikye byonka nibyo birikukoresibwa omu Uganda kandi ebindi tibyine katare.

Purezidenti Museveni arikugambaho na Rogers Mubiru (c), ori enyima y'okukora Bingwa Kiira Tricycle aha kujaguza ekiro ky'okwetegyeka omu disiturikiti eya Kitgum aharw'okubanza ebiro 09/10/2023.

Purezidenti yaashaba abanya-Uganda okureeba ngu bakwatanisa n’amahanga ga East Africa arikugira ngu eki nikija kubahwera kutungira ebintu byabo akatare.

Yayongyera yarabura ngu gavumenti terikwija kwitira omuntu weena eriisho orikuryangatanisa esente za gavumenti ngu ahabw’okuba abantu abo nibaba batarikwendeza Uganda kubagye.

Musevenu nabwo yakyoreka ngu abanya-Uganda baine kurinda eby’obuhangwa, eihanga ryaza kurwanisa ebigwererezi ebirikukira kuteganisa abantu ahi bamwe bahendire bafeeriirwe amagara gaabo.

Aharubaju orundi, Purezidenti yaragiira abantu abari omu bisharara okubirugamu omu busingye kandi ngu abari omu bicweka ebya Bukedi-Busoga na Kigezi nibaija kuhwerwaho kuruga omu kisharara eki barikuhingamu omuceeri bakabaasa kuguhinga barikwitirira ah’eitaka eritari mikusharara nainga okuriisa eby’enyanja aha mihegyeyo y’ebisharara kwenda ngu ebisharara ebitahiriirwe bibaase kugaruzibwaho.

Aha mukoro nigwo gumwe, abanya-Uganda 42 baheebwa emidaari etari emwe ahabw’ebibabaasize kukora kutunguura Uganda.

Omuhwezi wa Purezidenti wa Burundi, Prosper Bazombanza yahisya obutumwa bwe bw’okuramusya kuruga owa Purezidenti wa Burundi, Evariste Ndayishimiye burikuza aha bantu ba Uganda kandi yabaataabarusya okuhika aha myaka 61 y’okwetegyeka.

Minisita w’eihanga ow’enshonga z’aheeru omunda ya United Arab Emirates (UAE), Sheikh Shakhboot Nahyan Al-Nahyan nawe yaataabarusya Purezidenti Museveni n’abantu ba Uganda ahabw’okuhika aha myaka 61 y’okwetegyeka.

Minisita w’eihanga ow’enshonga z’aheeru omunda ya United Arab Emirates (UAE), Sheikh Shakhboot Nahyan Al-Nahyan arikugambira abagyenyi abaizire aha mukoro gw'okujaguza ekiro ky'okwetegyeka omuri Kitgum.

#WestUpdates