Bya Godfrey Kigobero

KKAMPUNI ya Vision Group etwala ne Bukedde, leero, ewaddeyo obukadde bw'ensimbi 130 , ziyambeko ku nteekateeka y'emisinde gy'amazaalibwa ga Ssaabasajja Kabaka ag'omulundi ogw'e 69.

Emisinde gino, gyakubaawo nga April 7 omwaka guno mu Lubiri e Mmengo n'omulamwa gw'Okulwanyisa mukenenya, ng'abasajja be basaale okutaasa omwana owoobuwala.

Ceeke ey'obukadde 130, yeetikkiddwa omukungaanya w'olupapula lwa Bukedde Micheal Mukasa Ssebowa ng'ali n'akulira ebivvulu bya Vision Group, Phiona Tamale , ne bagikwasa minisita w'e Mmengo avunaanyizibwa ku b'e Bimizannyo, abavubuka n'ebitone Robert Serwanga ku Bulange e Mmengo.

Mu balala ababaddewo, ye minisita w'ebyamawulire Isreal Kazibwe Kitooke n'abakungu abalala.

Mu kwogera kwe, minisita Serwanga, asiimye kkampuni ya Vision Group olw'okujjumbira okuwaayo , okutunda emijoozi n'okuwagira obwa Kabaka buli mwaka.

Akunze Obuganda bwonna, okujjumbira emisinde gino olw'okukuuma emibiri nga milramu bulungi n'okwongera okuwagira enteekateeka za Ssaabasajja Kabaka.

Ne Minisita Kazibwe naye agambye nti ku mulundi guno, baagala abantu emitwalo 120,000 beetabe mu misinde gino.

Mu kwogera kwe, Micheal Ssebbowa, yeeyamye okugenda mu maaso n'okuwagira Obuganda nti kuba Kabaka wabeera asonze , weewaba awatuufu.

Agasseeko nga Vision Group bw'erudde ng'ewagira Obwakabaka ng'eyita mu mizannyo gamba ng'ekigwo, okwenyigira mu by'obulamu n'emirimu emirala, okulaba nga Buganda edda ku ntikko nga Katikkiro bw'alambika.