Poliisi ekutte 34 ku by'okwekalakaasa n'okutuusa obuvune ku balala

ABANTU 34 abakwatiddwa mu bitundu bya Savanna , bagguddwako emisango gy'okwonoona ebintu, okutiisatiisa, okutuusa obuvune ku balala n'emirala.

Bano, bakwatiddwa mu bitundu omuli Luweero, Nakasongola, Nakaseke era nga mu kiseera kino,  bagenda mu maaso n'okubasunsulamu ku poliisi ez'enjawulo.

Omwogezi wa poliisi mu Savana, Sam Twiineamazima, agambye nti, bwe bamaliriza okubasunsulamu, ffayiro yaakuweerezebwa ew'omuwaabi wa gavumenti okubawabula nti n'oluvannyuma, batwalibwe mu kkooti.

Avumiridde effujjo n'ebikolwa ebirala ebyakoleddwa abantu bano mu kiseera ky'okulonda ne bwe kwabadde nga kuwedde.