Omusibe alemedde mu kaduukulu n'ategeeza akooye okuwalampa amadaala ng’agenda mu kkooti

AGAMBIBWA okukulira akabinja ka ADF Jamir Arirabaki Kyagulanyi amanyiddwa nga Jamir Mukulu alemedde mu kaduukulu ka kkooti, n’agamba nti akooye okuwalampa amadaala.

Omusango gwatandise bulungi ng’abawawaabirwa 18 okuli ne Jamir Mukulu weebali mu kkooti kyokka kkooti bwe yawumuddemu okulya ekyemisana , Mukulu n’asaba ab’amakomera bamukuumire awo ng’atudde kubanga alina obulumi mu magulu wabula ne bagaana. Baamulagidde n’addayo wansi mu kaduukulu.

Kkooti bwe yakomyewo looya we Patrick Kasumba n’ategeeza nti Mukulu agaanye okudda olwo Ofiisa w’amakomera ASP Derrick Ainebyona yabuulidde kkooti nti omusibe yabagambye tayinza kulinnya madaala mirundi ebiri olunaku noolwekyo anadda olulala.

Munnamateeka we Patrick Kasumba aleetedde kkooti ebbaluwa y’obulwadde okuva mu ddwaliro ly’amakomera e Luzira eyassibwako omukono mu November 2024 ng’egamba nti omusibe oyo mulwadde wa sukaali ne puleesa noolwekyo afuna obuvune obw’enjawulo mu magulu, mu nnyingo, mu mugongo ne bw’aba atambula.

Kyokka omulamuzi alagidde nti Mukulu bw’aba tasobola kuguma omusango gutandike okuwulirwa kkooti esobola okugenda mu maaso wadde nga taliiwo.

Ayongeddeko nti ono alina okulondako ku ky’ayagala omusango guwulirwe. Kkooti eragidde bafune engeri gye bajja okumutambuzaamu mu lutuula oluddako enkya.