Omupakasi atetemye Mukamaawe , lwa kugaana kumusasula 20,000

OMUPAKASI avudde mu mbeera, n'atemaatema mukamaawe n'amutta, lwa kugaana kumusasula shs 20,000/ , z'abadde akoledde

Poliisi e Kiboga ekutte Maniriho Baseme 27 omutuuze ku kyalo Kiryamuli mu muluka gw'e Nakasozi mu Ggombolola y'e Nakasozi e Kiboga, kubigambibwa nti asse mukamaawe Vincent Ssengaga 47 abadde omulimi owamaanyi mu kitundu ekyo.

Kigambibwa nti omugenzi , yapangisizza Baseme n'omulala Senteza bamunogereko  emmwaanyi ku shs 20,000/.

Nti nga bamalirizza omulimu, batandise okukanda Ssengaga ssente zaabwe era Maniriho n'asalawo okugenda n'endebe y'emmwaanyi emu ku kifuba , asobole okwesasula , boss kye yagaanyi.

Ekyadiridde Ssengaga kujjayo muggo n'akuba omupakasi , era omupakasi naye kwe kusikayo ejjambiya, n'amutema ensingo n'omukono n'abulawo.

Omwogezi wa poliisi mu Wamala , Lameck Kigozi, agambye nti bamuyoddeyodde ne bamutwala mu kalwaliro k'e Nakasozi ne bamwongerayo e Kiboga n'afiira mu kkubo.

Agasseeko nti embwa ekulembeddemu abasirikale ne bakwata omupakasi ono era akuumirwa ku poliisi e Kiboga nga n'ejjambiya ekozeseddwa mu butemu, nayo ezuuliddwa ng'okubuuliriza kugenda mu maaso.