Omubaka owa Kalungu East mu Palamenti ne ssentebe wa LCV bagenze mu Lwera okulaba abasaliddwaako amazzi
OMUBAKA owa Kalungu East mu Paalamenti, Francis Katabaazi Katongole akulembeddemu Ssentebe wa LCV, Ahmed Nyombi Mukiibi n'owa LIII ey'e Bukulula Sulaiman Kaweesi Bazadde, n'abalala ne basaabala amazzi okwetegereza embeera abatuuze b'omu Lwera e Lukaya mu Kalungu gye balimu.
Omubaka wa Kalungu East mu Paalamenti, Francis Katabaazi Katongole asitudde omwana ne Ssentebe wa LCV Ahmed Nyombi n'abalala nga bava okulambula abatuuze b’e Kamuwunga
Bya Ssenabulya Baagalayina
OMUBAKA owa Kalungu East mu Paalamenti, Francis Katabaazi Katongole akulembeddemu Ssentebe wa LCV, Ahmed Nyombi Mukiibi n'owa LIII ey'e Bukulula Sulaiman Kaweesi Bazadde, n'abalala ne basaabala amazzi okwetegereza embeera abatuuze b'omu Lwera e Lukaya mu Kalungu gye balimu.
Wadde omubaka Katabaazi ne banne basoose kutya okulinnya mu mazzi nti gayinza okubatwala naye oluvannyuma bagagumidde ne bagatambuliramu okweyongera munda awali amayumba ge batakyasulamu olw'amazzi okugayitiriramu.
Omubaka asing'anyeyo omwana ayandayanda n'amusitulayo, era ng'abatuuze babategeezezza nti embeera ekyabasobedde nga tebalaba we baddukira..
Omubaka Wa Kalungu East Mu Paalamenti Francis Katabaazi Katongole Ng'akwasa Abamu Ku Batuuze B'e Kamuwunga Abakoseddwa Amazzi.
Abatuuze balaajanidde omubaka ne bamutuma ewa Ssaabamisita Robinah Nabbanja nti akozese minisitule ey'ebiggwa bitalaze waakiri abadduukirireyo ku mabaati, obuwunga n'ebijanjaalo kuba amazzi gabatadde mu kattu.
Omubaka Katabaazi abasaasidde olw'akatuubagiro ke batubiddemu n'abagumya nti obuzibu bwabwe agenda kubwanjula mu Paalamenti n'eri Ssaabamisita basalirwe ku magezi.
Omubaka abakwasizza obuyambi n'agamba nti ye ng'omubaka ensawo ye nfunda n'abategeeza nti agenda kubasakira mu nsawo ennene eya Gavumenti n'anenya Bannakisinde banne abeesamba obuyambi obuva mu Gavumenti ng'ate buggyibwa ku musolo gwa Bannayuganda bonna.