Ochola alabudde Abasiraamu okwerinda mu bifo gye banaasaalira okwewala ebikolwa eby'ekitujju

Nga tujaguza Eid Adha ey’okusala ebisolo enkya, poliisi erabudde Abasiraamu okubeera obulindaala ku mizikiti n'ebifo gye banaasaalira okwewala ebikolwa eby'ekitujju.

Abaduumizi ba poliisi mu bitundu eby'enjawulo, nabo balagiddwa okukolagana n'obukiiko bwa Basiraamu obw’obyebyokwerinda okulaba nga wabaawo obukuumi obumala mu bifo.

Ochola Ng'annyonnyola.

Omuduumizi wa poliisi mu ggwanga Martine Okoth Ochola , ataddewo ebiragiro ebiwerako ebirina okugobererwa okwewala ebikolwa eby'ekitujju n'obubbi.

Ebimu ku byo, emizikiti n'ebifo byonna awagenda okubeera okusaala, balina okussaawo obukiiko bw’obyekwerinda bukolagane ne poliisi.

Babalagidde okwetegereza ennyo ebibeetoolodde n'okuloopa omuntu gwe bateekakasa. Okusaala nga kutuuse era nga kugenda mu maaso, walina okubaawo ebyuma ebikebera eri buli muntu ayingira nga bamwaza .

Abakeera ennyo okusaala, basaana okutambulira mu bibinja n'okwewala okuyitira mu bifo ebyenzikiza nga bagenda ku mizikiti oba mu bifo we banaasaalira.

Abaddukanya ebifo ebisanyukirwamu, balina okussaawo obukuumi obumala munda n'ebweru ate era bakolagane bulungi n'abakuumaddembe nga waliwo n'emiryango egiwerako egifulumya amangu abantu nga wabaddewo obulabe. Ochola , yayagalizza Abasiraamu bonna Eid - Al - Adha ey’emirembe.