Minisita atenderezza Abayindi abajjumbidde okusasula emisolo

MINISITA wa Buyindi ow’ensonga z’ebweru Dr. Subrahmanyam Jaishankar, agambye nti Buyindi yaakwongera okunnyikiza eby’ensuubulagana ne Uganda ne yeebaza Abayindi abakolera kuno.
Minisita Jaishankar ali ku bugenyi kuno, yabadde asisinkanye Abayindi abasuubuzi, abakakkalabiza emirimu gyabwe wano mu Uganda nga yawerekeddwaako minisita w’ebyobusuubuzi mu ggwanga Francis Mwebesa. Baasisinkanye abamu ku basuubuzi Abayindi abakolera mu Uganda okwabadde; Varghese Mundamattam akulira olukiiko lwa yunivasite ya ISBAT olufuzi, Rajesh Chaplot omusuubuzi w’omu Kampala n’abalala, ku wooteeri ya Serena wiiki ewedde.
Yagambye nti wadde Uganda ne Buyindi balina enkolagana ennungi, naye ekintu ekijja okunyweza enkolagana yaabwe by’ebyobusuubuzi.Yagambye nti enkolana ennungi yeetaagamu ebyobusuubuzi, nti era ekigendereddwa mu kukyala kwe kuno ne bwanaaba azzeeyo e Buyindi, wakutunuulira engeri y’okugaziyaamu emiwendo gy’ensuubulagana wakati wa Uganda ne Buyindi amawanga gombi okwongera okukula.
Minisita Mwebesa yeebazizza Abayindi abali kuno olw’okusasula obulungi emisolo gyabwe kyagambye nti kikulu eri enkulaakulana y’eggwanga. Yagambye nti, waaliwo abayindi abasoba 30,000 ababeera mu Uganda era bakoze kinene okusitula ebyobusuubuzi mu by’amakolero, eby’obulambuzi, ebyobulimi n’ebirala. Yogedde ku bizinensi nga; Roofing, Bank of Baroda, Airtel , Bank of India ne Exim Bank nti ziwadde eggwanga emisolo minene , egiyambye ku nkulaakulana.
Aba yunivasite ya ISBAT yabasiimye okutumbula ebyenjigiriza