Lukanga yedizza ekikopo kya National Open mu bikonde

Kiraabu y’ebikonde eya Lukanga Boxing Club eyongedde okusajjalaatira mu bwa nnantameggwa mu muzannyo gw’ebikonde bwe yeddizza engule ya National Open.

Engule yagyeddizza ku Ssande ku fayinolo y’empaka zino ezimaze wiiki emu nga zibumbujjira mu kisaawe ekibikke ekya Lugogo Indoor Arena.

Pulezidenti wa Uganda Boxing Federation (UBF), Moses Muhangi ye yakwasizza aba Lukanga ebikopo n’abawa ne pukipiki ya Bajaj basobole okufunamu ensimbi ezirabirira abazannyi.

Lukanga yawangudde n’obubonero 132 omugatte okuva mu baawangudde omutendera gwa junior, youth ne elite.

Kapiteeni wa Lukanga Boxing Club, Ronald Nsamba yategeezezza nti baabadde ku biragiro bya mukama waabwe Sam Lukanga eyabatumye ebikopo oluvannyuma lw’okutendekebwa okw’amaanyi okwetegekera empaka zino.

Boxing

“Twabadde tulina okukola ennyo kubanga baatutumye bikopo na buwanguzi,” Nsamba era nga ye yalondeddwa ku buzannyo bw’empaka zino mu basajja bwe yategeezezza.

Ye pulezidenti wa Uganda Boxing Federation (UBF), Moses Muhangi asiimye omutindo gw’abazannyi nti gulinnye okuva lwe baateekawo empaka za Champions League nga z’empaka omulondebwa ttiimu y’eggwanga eya Bombers.

“Empaka zibaddemu okuvuganya kunene kubanga kabadde kasengejja okuzannya mu za Champions League. Edda ng’omuzannyi olutuuka ku fayinolo ya National Open ng’amanya nti atuuse ku ttiimu y’eggwanga naye kati kirala, Muhangi bw’ategeezezza.

Agambye nti singa babadde n’ensimbi okuva mu gavumenti baandibadde batandika okutambuza abazannyi abatali bamu okvuganya mu mpaka za National bamu nga babatwala okuvaugnya mu mawanga amalala okwongera okubangulwa.

“Omutindo gubadde waggulu ddala. Singa tubadde ne ssente abazannyi baffe baandinadde beetaba mu mpaka za National Championships eziri mu mawanga agatali gamu,” Muhangi bwe yategeezezza.

Abazannyi 500 okuva mu kiraabu 52 be bavugannyizza mu mpaka za National Open omwaka guno nga kubaddeko abakazi 72.

Kiraabu 10 ezakulembedde n’obubonero:

Club      Junior   Youth   Elite   Total

1. Lukanga   38     49       45     132

2. COBAP    10     09      20        39

2. UPDF       03     05      31        39

4. Kyanja      16    00       11        27

5. Zebra         02   15       05        22

5. Sparks       00   13       09        22

7. Kololo       00   06       15         21

8. Kyengera   07   09       04        20

8. Mutajazi    02    07       11        20

8. Kololo H   02    04       14        20

11. Army       06    00       13        19

12. Gideon    07    03       05        15

12. Sakku      05    00       10        15

12. Boggie     00    04       11        15

15. Busega    09    00        04        15

Abaasinze okukola obulingi:

Abasajja – Ronald Nsamba – Lukanga BC

Abakazi – Michelle Nanyonjo – Lukanga

Ddiifiri eyasinze – Rebecca Namataka – UPDF

Omutendesi eyasinze – Derrick Nyeko – KCCA