Eyali pulezidenti wa Nigeria y’omu ku bagenda okulondoola akalulu ka Uganda wiiki eno

EYALI pulezidenti wa Nigeria, Goodluck Jonathan, awabudde abeesimbyewo ku bifo by’obukulembeze ku mitendera egy’enjawulo mu ggwanga okutakabanira okukyusa obuyinza mu ddembe.

Eggulo ono yagenyiwaddeko ku kitebe ky’ekibiina ki National Peasants Party (NPP) e Kasubi mu Lubaga we yeetabidde mu kafubo n’abakulira ekibiina kino ng’eggwanga lyetegekera okulonda kwa pulezidenti n’ababaka ba palamenti Olwokuna.

Goodluck yabadde akuliddemu ttiimu y’abazze okulondoola akalulu abali wansi wa AU-COMESA -IGAD Observer Mission nga bano bazze okulondoola okulonda bwe kugenda okutambulamu mu Uganda.

Ku kitebe ky’ekibiina kino baayaniriziddwa pulezidenti waakyo, Robert Kasibante,era akwatidde ekibiina bendera ku bwapulezidenti, ssaabawandiisi w’ekibiina Shafik Nambaale n'abalala era olwatuuse ne beesogga akafubo.

Goodluck yabannyonnyodde nti ekigendererwa ky’obugenyi buno, bo ng’abali ku mulimu gw’okulondoola okulonda baayagadde okumanya buli kibiina wa we kirina obutali bumativu we babeera basimba essira nga bali ku mulimu gwabwe ogw’okulondoola akalulu kano.

Ssaabawandiisi w’e kibiina kino, Shafik Nambaale, yaloopedde Goodluck n’abakungu be yagenze nabo, obutali bwenkanya mu kulonda omuli n'okubeera ng'akakiiko k'ebyokulonda bo nga National Peasants Party bwe kaabadde kagabira ebibiina by’obufuzi enkalala z’abalonzi mu ggwanga bo tekaabawadde.

Nambaale era yaloopye nti ssentebe w’akakiiko k’ebyokulonda omulamuzi Simon Byabakama, yava dda ku ky’okugoberera amateeka n’okukolera eggwanga akolera kibiina kya NRM.

Pulezidenti w’ekibiina Robert Kasibante, yattottoledde abakungu bano obugubi bwe bayiseemu nga banoonya akalulu okwetooloola eggwanga omuli okubayisanga mu nguudo embi, ebitongole by’ebyokwerinda okukwata abawagizi baabwe n’ebirala.

Kasibnate agamba nti mwami Museveni asaanye okukoppa bakulembeze banne bye bakoze agoberere enfuga y’amateeka era akkirize bwe banaaba bamusinze akalulu eggwanga lisobole okugenda mu maaso.

Omwogezi w'ekibiina kino, Thomas Bagonza, yasiimye pulezidenti Goodluck ne banne okuvaayo okulondola embeera ya kalulu n’ategeeza nti bamukkiririzaamu kubanga azze alaga ebyokulabirako ebirungi.

Bano Goodluck yabayozaayozezza okubeera nga beetabye mu lwokaano era n’abagumya nti bazze okulondoola okulaba nga byonna bitambula bulungi n’ensonga zaabwe ze baanokoddeyo zigenda kussibwako essira era waakuzanjulira be kikwatako.