MINISITULE y’ebyobulamu, yalangirira nga mu Kampala bwe mubaluseemu obulwadde bw’amaaso obumanyiddwa nga ‘Red Eye’. Abasawo bagamba nti obulwadde buno busobola okusaasaana okuva ku muntu omu okudda ku mulala, singa tewaba kwegendereza. Abayizi engeri gye bawummudde, kyangu obulwadde buno okusaasaana mu bitundu by’eggwanga ebirala, kubanga abayizi basobola okubuggya ku masomero gye babadde, ne babutwala ku byalo gye babeera. Okusinziira ku kiwandiiko ekyafulumiziddwa minisitule y’ebyobulamu, abazadde baaweereddwa amagezi okubaako bye bakola awaka, okwewala okusaasaana kw’obulwadde buno. Obulwadde buno bwe bukukwata, amaaso gombi gakosebwa, ne gakusiiwa nnyo, nga gavaamu amaziga, era oyinza n’okufuna okunyiza.
Abaana ke bakomyewo awaka, bateerewo amazzi ne ssaabbuuni, banaabe engalo buli kiseera, okusobola okutta obuwuka obuleeta obulwadde buno. Weewale okukwata mu ngalo z’omuntu akawatiddwa obulwadde buno, oba okukwata ku bintu bye, era n’abaana obagambe babeere beegendereza obutakikola.
Eddagala eritta obuwuka mu ngalo, (sanitizer) eryakozesebwanga mu biseera bya Covid–19, nalyo ligule libeere awaka, abaana babeere nga balinaaba mu ngalo zaabwe, buli lwe bava mu kutambula mu mikwano gyabwe.
Bwe wabaawo akwatiddwa obulwadde buno awaka, mukubirize yeewale okukunya amaaso wadde gamusiiwa, kubanga kino kyongera kusajjula mbeera. Ebintu ebikozesebwa abeera alwadde, okugeza engoye, ttawulo, amasuuka, galubindi, n’ebirala, mwewale okubigabana awakakubanga mwenna mwandikwatibwa obulwadde buno. Embeera bweba ekutabudde, oba okumanya ebisingawo ku bulwadde buno, ali e Kampala kubira KCCA ku nnamba 0800 299000 etali yakusasulira. Oba okubire minisitule y’ebyobulamu ku 0800 100066 nayo etali yakusasulira.