Bagguddewo omwoleso ogugatta bannalotale mu bya bizinensi

Omwoleso guno ogutambulidde ku mulamwa ogugamba nti, ''Building bridges and unlocking opportunities'' gugendereddwamu okutumbula bizinensi ezikolebwa bannalotale.

Gavana wa rotary owa district 9213, Ann Nkutu ategeezezza nti bazze okulaga bizinensi ze bakola n'okulaba nti bannalotale bamanyagana, okukulakulanya bizinensi zabwe n'okwegatta.

Abamu Ku Basuubuzi Aboolesezza

Maggie Naimanye, akulira kampuni ya strategic partnerships era nga y'omu bu bategesi bomwoleso guno ategeezezza nti bagala okulaba nga bannalotale aba district 9213 ne 9214 begatta okukolaganira awamu mu bizinensi n'okwekulakulanya.

Ono era ategeezezza nga omwoleso bwe guguddwaawo ne ku bantu bonna abatali bannalotale, nga baagala okwongera okugimanyisa mu bantu n'okutuuka ku muntu wawansi.

Naimanye agambye nti olw'okwagala okugonjoola ebimu ku bizibu ebisomooza abavubuka, ng'okuwanduka mu masomero n'okubulwa emirimu, basazeewo okubatandikirawo Youth Business Challenge nga bayita mu kisinde ekya Vija na powa okulaba nga babateerawo empaka z'okukola ebintu eby'enjawulo n'okukyusa endowooza zaabwe, era nga bajja kuweebwa awaadi omwaka ogujja.

Omwoleso guno wadde mulimu abakola ebintu eby'enjawulo binji, naye essira basinze kulissa ku byansoma, tekinologiya, eby'obulimi ebivaamu ssente  n'ebyanfuna. Naimanye era ayagala bannalotale abaayolesezza okuwa abavubuka bano emirimu n'obukugu nga babatendeka.

Ssentebe wa Rotary Means Business, Edward Luyombya ategeezezza nti guno gwe mwoleso ogw'omulundi ogw'okubiri era nga gwakubeerawo buli mwaka, nga baagala obuweereza bwabwe butuuke ku bantu era babawagire.

Kampuni ez'enjawulo zoolesezza era ne banyonyola bye bakola.

Kkampuni ezisoba mu 170 ze zoolesezza ebyamaguzi. Munnalotale, Dr. Peter Kimbowa akulira CEO Summit Uganda awabudde bannalotale bano n'okubawa obukugu okusobola okutwala bizinensi zaabwe mu maaso, era ne bakubaganya n'ebirowoozo.