Alein Skin ayingizza Clever J mu kibiina kye n’amwebaza 'Mbadde nneeraba ng’eyasiimuuka’

Bya Emmanuel Ssebanenya ne Ignatius Kamya

Clever J kyaddaaki bamuyingizza mu Fangone Forest ya Alien Skin: Ssaawa ya kukola mmane!

Wadde ayimbidde akabanga akawera, yaakamanyika ennaku zino bwe yakubye ennyimba nga ‘Sitya Danger, Twayiseeko dda, Enfunayo, Lock down’ ne zikwatayo ate n’abantu ne bamwagala. Bwe yategeka ekivvulu kya Sitya Danger ku Freedom City ne kiyitirira.

Omuyimbi ono Patrick Mulwana amanyiddwa nga Alien Skin y’aliko ennaku zino, agaanyi okutuuka yekka ku ntikko n’okuliira akasente ke mu nkukutu. Wadde tannaba kuyimbira bbanga ddene, aleeseewo eng’ombo ya ‘yagaliza ofune’.

W’osomera bino ng’omuyimbi Gerald Muwonge amanyiddwa nga Clever J, mutaka mu Fangone Forest era kati bakola bonna.

Ono yasooka kumusembeza mu kivvulu kye ekya Sitya Danger ku Freedom City n’oluvannyuma ne bakola oluyimba lwa ‘Binyuma Bitya’.

Bino Clever J abikakasirizza mu lukung’aana lwa bannamawulire lwe yatuuzizza e Makindye kumpi ne kkooti ku Lwokutaano okubategeeza ku nteekateeka z’ekivvulu kye era ng’abadde ne munywanyi we Alien Skin. Clever J asiimye Alien Skin okumuzza ku maapu y’endongo kubanga ekituufu kiri nti naye abadde yeeraba nga eyasiimuuka ng’era buli kimu yakikwasa Mukama Katonda.

Ye Alien Skin asabye abantu bonna Clever J be yali anyiizizzaako okumusonyiwa baddemu bamuwagire kubanga omuziki agutegeera.

Alien takomye ku kuyamba Clever J yekka wabula yalabiddwaako mu situdiyo ng’akola oluyimba ne Diana Nalubega.

Ono naye ensi y’ebidongo ebadde yamwerabira. Era yalabiddwaako e Makindye ku Kibaati gye yasanze eyali omuyimbi wa Hip Hop ne Ragga, Rocky Giant n’ayogerako naye n’okumusaba addeyo mu muziki.

Kyokka olw’ebintu Rocky Giant by'akozesa, yalabise ng’ayinza okumukaluubirira.  Yakutte mu nsawo n’amusimba amazike abiri abeerewo, ekitatera kusangika ku bayimbi b’e Uganda.

Okumanya Alien Skin awadde Clever J amaanyi, naye yeevuddemu n’ategeka n’ekivvulu akakase oba ddala abawagizi be akyabalina.

Ne Alien yayongedde okulinnya eddaala anti ennaku zino atambulira mu Range Rover. Oba yagyeyiyeemu? Tunaabiwulira!!!!