ADF erumbye ekyalo ekirala e Kamwenge n'etta 3!

Abagambibwa okuba abayeekera b’ekibiina kya ADF, balumbye ekyalo Nyabitusi I, ekiri mu muluka gw’e Busingye mu ggombolola y’e Kamwenge mu disitulikiti y’e Kamwenge, ne batta abantu basatu.

Omwogezi wa Poliisi mu kitundu kya Rwenzori West, Vicent Twesige  ategeezezza Bukedde, nti bano okuttibwa baabadde beebase enju mwe baabadde ne bagiteekera omuliro n’eteta n’esaanawo, ekiro ku lunaku lwa kulisimaasi.

Ennyumba egambibwa okwokebwa abayeekera.

Abattiddwa kuliko; Amon Niwalinda, ow’emyaka etaano, Mathias Byamukama 13, ne Adrine Niwabizi,72. Twesige, ayongeddeko nti bongedde okunyweza ebyokwerinda mu kitundu kino nga bayambibwako ebitongole by’ebyokwerinda eby’enjawulo.

Kigambibwa nti enjega eno yaguddewo ku ssaawa 4:00 ez’ekiro era ng’abaalumbye kigambibwa okuba nga baabadde bana, nga babagalidde emmundu bbiri. Kitegeerekese nti olwamaze okwokya abaabadde mu nnyumba, ne bakuliita n’Embuzi zaabwe 10, ebijanjaalo n’ebirala.

Bino nga tebinnagwawo, kigambibwa nti bano era baasoose kulumba kiraalo kya nte za Rev. George Bwajojo eziwera 50 kyokka ne zibalemerera okutwala.

Bino we bijjidde ng’abatu 10, baabadde baakattibbwa ku byalo okuli; Omukamwenda, Fasha, Nyabutusi-Kitehurizi, ne Kyabandara, era nga olunwe abeeby’okwerinda baalusonga ku  ADF.

 Wadde ng’amyuka omuduumizi wa Poliisi mu ggwanga, Maj.Gen. Godfrey Katsigazi yalambula ebitundu ebyakosebwa n’agumya abatuuze, abasinga ku bo kigambibwa nti batandise okudduka ku byalo byabwe nga batya okufiirwa obulamu bwabwe.