Ab'e Lwabenge abaakosebwa ekyeya bafunye ttani z'ensigo 10
ABATUUZE mu ggombolola ssatu Bukulula, Lwabenge ne Lukaya e Kalungu ababadde basobeddwa eky'okuzaako olw'omusana okusanyawo emisiri gy'emmere n'emmwaanyi,bafunye ku ssuubi bwe baddukiriddwa n'ensigo ya kasooli asoba mu ttani kkumi.
Ebimu ku bintu ebigabiddwa
By John Bosco Sseruwu
Journalists @New Vision
ABATUUZE mu ggombolola ssatu Bukulula, Lwabenge ne Lukaya e Kalungu ababadde basobeddwa eky'okuzaako olw'omusana okusanyawo emisiri gy'emmere n'emmwaanyi,bafunye ku ssuubi bwe baddukiriddwa n'ensigo ya kasooli asoba mu ttani kkumi.
Obuyambi buno bubaweereddwa eyaliko Minisita w'ebyokwerinda kati omuwabuzi wa Pulezidenti Vincent Bamulangaki Ssempijja oluvanyuma lw'enkuba ettonya ensangi zino.
Ssempijja ategeezezza nti embeera y'ekyeya ekikulungudde ebbanga mu ggwanga evuddeko ebbula ly'emmere mu bantu, ky'agamba nti kyekimu ku bimuwalirizza okubafunira ensigo ya kasooli akula amangu.
Ssempija ng'ayogera n'abalimi abafunye ensigo
Ategeezezza nti entekateeka eno erimu n'okugaba endokwa z'emmwaanyi tetalizza na bavubuka nti nabo benyigire mu kuteekawo obungi bw'emmere n'okwongera okukyusa embeera zaabwe nga basitula eby'enfuna.
Ssempijja era agumizza abalimi nti Gavumenti eriko wetuuse ku entekateeka y'okubafunira amazzi agafukirira ebirime mu budde bw'omusana omungi,kyokka abalina obusobozi abasabye okwejjamu obugayavu nti beeterewo enkola ezaabwe ezisoboka.
Ensigo eno ekwasiddwa abamu ku bakulira abalimi mu kitundu abategeezezza nti bagenda kukwatagana n'abakulembeze b'ebyalo okuzuulira ddala abatuuze abali mu bwetaavu ennyo nti bebaba basookerwako
Abalimi ssekinoomu abafunye ensigo basiimye Ssempijja okubalumirirwa,ne balaga essuubi nti bakuddamu okufuna emmere mu bwangu.