Ab'e Banda bawonye okunywa amazzi g'ebidiba
ABATUUZE b'e Banda mu zooni III mu Munisipaali y'e Nakawa bafunye akaseko ku matama oluvannyuma lw’okubazimbira oluzzi lw’omudumu olupya lwe bagamba nti lugenda kukendezaako ku bbula ly’amzzi mu kitundu kyabwe.
Zhong Shuang Quaw ssentebe wa Overseas China- Uganda Charity Foundation ng'akwasa ab'e Banda oluzzi lw'emidumu
NewVision Reporter
@NewVision
Abatuuze nga bakulembeddwamu ssentebe waabwe Ben Nangabo bategeezezza nga bwe bamaze ebbanga lya myaka munaana nga batawanyizibwa ekizibu ky’amazzi mu kitundu kyabwe naye kati bafunye essuubi oluvannyuma lwa Sipiika w'e Nakwa Godfrey Luyombya ng'ayita mu kitongole kye ekya Godfrey Luyombya Foundation nga ayambibwako ekitongole ky’Abachina ekya Overseas China- Uganda Charity Foundation.
Luyombya ategeezezza nga bwe yatuukirira aba Overseas n’ababuulira obuzibu abatuuze bano bwe bayitamu okufuna amazzi nabo kwe kusitukiramu ne babazimbira omudumu guno.
Luyombya ategezezza nga bw’asazeewo okusaka oluzzi luno ku lw’abakyala kubanga be basinga okutawaanyizibwa n’ekizibu ky’amazzi wamu n’okugetaaga ennyo naddala mu kwoza n’okukola emirimu gy’awaka.
Ben Nangabo, ssentebe w’omukitundu ategeezezza nga bwe bagenda okuteeka amateeka ku luzzi luno naddala nga tebakkiriza baana kuluzannyiramu era abo abanaasangibwa nga balukozesa bubi baakangavvulwa.
Omubaka wa Nakawa East mu Palamenti Ronald Balimwezo asiimye nnyo aba Overseas okubazimbira oluzzi kyokka n’asaba Gavumenti okukendeeza ku musolo ogussibwa ku mazzi kiyambeko obutakalubiriza bantu ku kugafuna.
Zhong Shuang Quaw ssentebe wa Overseas China- Uganda Charity Foundation ategezezza nga bwe batandika enkola eno mu myaka ng'esatu emabega era nga bazimbiddemu enzizi eziwera 30 mu bitundu by’eggwanga ebyenjawulo oluvannyuma lw’okukizuula nti beetaaga amazzi amayonjo.