Abavandimwe basabye abayizi ba Yunivasite zonna okulonda Pulezidenti Museveni

ABANYARWANDA bannayuganda ebeegattira mu kibiina ky’Abavandimwe bongedde okunoonyeza Pulezidenti Museveni akalulu ka 2026 bwe bankuze abayizi ba zi Yuvinaasite Abannarwanda nabo okukamuyiira mu bungi.
Baakulembeddwa ssentebe waabwe Frank Gashumba mu lukungaana lwe baategese mu kibangirizi kya wooteri ya Speek mu Kampala. Gashumba yategeezezza nti baayise abayizi ba Yunivaasite ez’enjawulo olw’oku nti ebimu ku bye balina okusooka okukuuma gye Mirembe egayaleetebwa Museveni.

Abavandimwe

Abavandimwe babadde bammibwa paasipooti ne Desinte z’eggwanga nga bavunaanibwa ogw’okubeera Abanyarwanda, kyokka kino Pulezidenti yakigonjoola n’ekiragiro kye kati nga ffe tulina ensonga lwaki tugenda kukamuyiira akalulu n’ebitundu 90 ku 100. Gashumba bwe yategeezezza.
Bano baatogozezza kkampeyini yaabwe gye baatuumye “Tuzamutoora Yoweri” ekivvunulwa nti tugenda ku kulonda Yoweri. 
Gashumba yatenderezza ekiragiro Museveni kye yayisa n’agamba nti bukya kiyita, Abavandimwe 98 ku 100 abaali bammibwa Paasipooti kati baazifunye.
Gashumba yategeezezza abayizi bano nti obuweerero bwe balina kwe basomera wakati mu mirembe Museveni gye yaleeta n’agamba nti singa Uganda etabanguka, tebasobola na kusala kuva mu kisulo kuyingira bibiina mwe basomera n’abasaba akalulu kaabwe okukasuulira Kaguta.

Bushana ng'ayogerera mu lukiiko lw'Abavandimwe

Yabasabye era obutakoma ku kalonda kwokka wabula n’okukamunoonyeza nti lye ddimu ly’abatisse. Newankubadde yabasabye kino kyokka yabakuutidde okunyweza ekkalaamu singa baakubeera ab’omugaso mu ggwanga n’obutanyooma mirimu.
Yakubirizza abayizi obutenyigira mu mivuyo mu kiseera ky’okulonda n’abasaba nti bwe bamala okukalonda badde awaka bakomewo waakiri akawungeezi mu kiseera ky’okukalangirira okulaba oba gwe balonze awangudde okusinga okugumba we balondera ng’abalala kye batembeeta.
Abalala abaakubirizza abayizi bano ye Justine Buchana eyabasabye obuteetirira nga balonda ate n’okulonda n’ekigendererwa.