Abalamazi abasoba mu 50 bakomyewo okuva e Mecca

Bya Godfrey Ssempijja e Ntebe

EKIBINJA ky’Abalamazi ekisooka eky’abantu  abasoba mu 50 kikomyewo mu ggwanga okuva e Mecca gye baagenda okulamaga, nga bano bamazeeyo wiiki bbiri era baali bakulembeddwaamu Supreme Mufti ayawummula  Sheikh Kasule Ndirwangwa. 

Bano bakomyewo mu ggwanga ku ssaawa 9.30 ezaakawungeezi k’eggulo  era nga bano baayaniriziddwa  abakungu okuva mu ofiisi okuli; akulira emirimu mu ofiisi ya Sheikh Ndirangwa  Sheikh Hamidu Katerega n’abalala .

Sheikh Kasule Ndirangwa oluvannyuma lw'okutuuka ku kisaawe ategezeeza nti musanyufu nnyo okuba nga akomyeewo bulungi n’abantu be yagenda nabo n’agamba nti basobodde okulambula ebifo eby’enjawuulo eby'Obusiraamu era bino byonna bagenda bafunayo eswala..

Sheikh Kasule Ndirangwa Wamu N'abamu Ku Balamazi Nga Baakatuuka Ku Kisaawe Ky'ennyonyi E Ntebe Okuva E Mecca.

Ono agenze mu maaso n’agamba nti asinze kusabira ggwanga wamu n’abantu okusobola okuyita mu mwaka obulungi era Allah abayambe okuvvuunuka ebizibu eby’enjawuulo kw’ossa n’abakulembeze naddala omukulembeze w’eggwanga Yoweri Museveni okusobola okukulembera eggwanga obulungi .

Annet Wanyana Hadijah omu ku balamazi ategeezezza nti musanyufu nnyo okuba nga batambudde bulungi okugenda n’okukomawo okuva e Mecca n’agamba nti basobodde okusabira eggwanga okuyita mu mwaka guno obulungi wakati mu kusoomoozebwa okw’enjawulo naddala mu byenfuna n’endwadde ennyingi eziri mu nsi .