Abadde akuba bbulooka okufuna ffiizi afunye 15!

WUUNO omuyizi  abadde akuba bbulooka okufuna ebisale yafunye 15 ng’ate abadde asoma ayosa ng’okusinga obuwanguzi y’abwesigamizza ku pass PLE wa bukedde ne nnanyini ssomero abadde oluusi amuddiramu n’asoma nga tannasasula.

Joshua Nabasa 13, omuyizi ku ssomero lya Kingdom Junior school  erisangibwa ku luguudo lw’e Bombo  yafunye 15 ng’ebisale by’essomero abadde  abijja mu kukuba bbulooka ne kitaawe  Alex Byabagambe omutuuze w’e Kigoogwa  mu  disitulikiti y’e Wakiso .

Nabasa yagambye nti ennaku ezimu teyazisomanga ng’alina okusigala akube bbulooka kuba mwe mubadde muva ebisale by’essomero.

Yagambye nti alina baganda be abalala bonna kitaabwe y’abaayigiriza omulimu gw’okuba bbulooka  ng’okuyita yakutadde ku PASS PLE wa Bukedde ng’ono kitaawe abadde amumugulira

Yagambye nti  maama waabwe yafa ne basigala ne taata waabwe ng’asaba Katonda awangaaze kitaawe asobole okumulabirira ng’akuze.

Yagambye nti omulimu gwa bbulooka mw’aggye ssente okulabirira ffamire ye wabula ng’alina okusoomoozebwa kw’asanga okuli abatwala bbulooka ku bbanja ne bagaana okusasula, mu biseera by’enkuba  baba tebasobola kukuba bbulooka kuba bazikubira mu ntobazzi waba wajjudde amazzi .