World Voices Uganda batendeka abantu abarikucwa emanja aha byaro

World Voices Uganda batendeka abantu abarikucwa emanja aha byaro

By Thomas Tumwebaze

KAGADI

Nk’omuringo gumwe gw’okwenda kukyendeeza aha mishango omubyaro, ekitongore kya World Voices Uganda kikwatanise na Pooriisi batendeka abarikuza kuguma barikucwa emanja ezimwe omu byaro bataagire kuza omu kooti ninga pooriisi.

Okutendekwa oku okuri ahansi y’omutwe, “Okuhisya obuheereza bw’ebyoburamuzi omu byaro” kugyenderiire okuheereza abantu abatoriinwe okuba n’obukugu okumanya n’okwetegyereza oku barikubaasa kucwa n’okumara enshonga ezitiine maani omu byaro ahu barikutuura.

Abantu abarikurenga 50 okwetorora disiturikiti ya Kagadi nibo batendekwa omu mushomo ogwaba guri aha Demu Hotel omu tauni eya Kagadi.

Omu nkora egyi, abarikuza kucwa emanja tibarikuza kuba nibashashuza esente zoona.

Gard Benda Ntegyereize, ori mukuru w’ekitongore kya World Voices Uganda naagira ngu enkora egi eine kutekwamu ekitiinisa kandi yashaba abatendekirwe obutarya nguzi ninga okugwera orubaju nikwe babaase kuheereza abantu baabo n’oburingaaniza.

Benda naagira ngu eki nikija kureetaho obusingye hamwe n’okukyendeeza emishango omu kooti z’eihanga.

Okutendeka abatuura enkora eya Bataka Kooti

Benda nagumizamu agiira ngu batendekire abantu abarikwebembera batahi babo nk’abeebembezi b’amadiini, ab’eminyeeto, bakirinju nikwo babaase kuheereza abantu kurungi.

“Itwe nka World Voices Uganda tukatandika enkora ya Bataka Kooti omu mwaka 2010 bwanyima y’okwetegyereza ngu abantu bakaba nibakozesa esente nyingi okutunga obuheereza bw’amateeka kandi obundi emishango yaabo ehendera erikutwara obwiire bwingi kuhwa ninga obundi erema” Gard Benda nikwe yashoboorora.

SP Patrick Opio, omuduumizi wa pooriisi omu disiturikiti ya Kagadi yashaba abatendekirwe okuba n’emicwe baaba nibacwa emishango egi nikwe abantu babatemu ekitiinisa hamwe n’encwamu yaabo.

Patrick Opio, Omudumizi Wa Police Omu District Ya Kagadi

Opio yayongyera yaagira ngu nka pooriisi nibaha obwema ahabwabusha bitu kandi abantu nibaguma barikwanga kutamu ekitiinisa omu bwema bwa police kandi abandi babuza ameisho.

“Ninyenda kubahabura ngu mwaba nimucwa emanja mumanye ngu muri abantu b’amaani kandi reka abantu batakukwatamu kubi. Mube abegyendesereza omumurimo ogu” DPC Opio arikushoborora.

Bo abatendekirwe baasiima ekitongore kya World Voices Uganda ahabw’okubaheereza obwengye bw’okutaho obusingye omu byaro byabo.

Nibagira ngu batwire nibagyezaho okumara enshonga zimwe bitu kandi baburwa obukugu hamwe n’obutamanya biragiro.

Emishango erikwingana 42,362 niyo ekozirweho kandi yahwa obwe erikukorwaho n’ekitongore eki kandi nikwe kucwamu kutendeka abantu omu byaro abaragume nibakora ahanshonga ezi zitakagiire omu kooti ninga police.

Enkora y’abatuura kooti egi egyendereire okutaho obusingye hamwe n’okumaraho obutabanguko, kworeka omurimo gwa police omukumaraho emishango hamwe n’ebindi.

Enkora egi eri omu disiturikiti nka Kagadi, Kikuube, Kakumiro hamwe na Kyegegwa.

#WestUpdates