Turyagyenda, Rwampororo na Kebirungi aba Ntare School bateirweho ogw’okukoresa kubi ofiisi.

N’ebya Omushaki weitu

KAMPALA

Owabaireho heedimasita wa Ntare school omuri Mbarara, Jimmy Turyagyenda ateirweho omushango gw'okukoresa kubi ofiisi ye hamwe n’okufeereza gavumenti esente zirikurenga Shiringi miriyooni 110.8 ahabw’okugambwa kuba yaashashwire omukozi w’eishomero omushaara n’obusiimo omu bushobya.

Turyagyenda najunaanwa emishango egi na mukuru w’eishomero erya Ntare school oriho obwa hati, Saul Rwampororo hamwe n’owabaire ari omuhandiki w’eishomero eri, Peace Kebirungi.

Turyagyenda arebukireho omu kooti erikurwanisa obushomankuzi omuri Kampala ebaire ekuriirwe omuramuzi Christopher Opit nikwo kwehakana emishango egi yoona.

Rwampororo na Kebirungi bahairwe ebaruha eriho emishango ei barikujunanwa bwanyima y’okuremwa kureebukaho omu kooti kwetonganaho omu mishango egi.

Abahababi nibagira ngu Kebirungi akaguma naatunga omushaara gwa gavumenti ahagati y’okwezi kwa 9, 2015 hamwe n’okwa 8, 2024 n'obu yaabaire atakikora mirimo ye bwanyima y’okutunga ‘leave’ y’okushoma arikushashurwa omu buhenda biragiro.

Omu mwaka gwa 2023, Kebirungi nagambwa kuba yaahandikire arikushaba kuhuumura kare emirimo ye.

Beitu hoona, abahababi ba gavumenti nibagira ngu Rwampororo akahayo okushaba kwa Kebirungi n'obu yabaire yaasigireho emirimo ye kandi atarikwikirizibwa kuhuumura obwire obwo.

Omuhababi w'ekitongore ekya kariisho riisho wa gavumenti Racheal Pappali amanyise kooti ngu ekitongore kikiriyo nikicondooza omu nshonga egi.

Eki kigyemeseriize omuramuzi Opit okwongyezayo omushango ogu kuhisya ebiro 20.11.2026.

#WestUpdates