TASO eragiirwe kushashura Sh190m omushaija owateirwe ahari ARVS ataine siriimu.

N’ebya Omushaki weitu

JINJA

Kooti enkuru omuri Jinja eragiire ekitongore kya TASO Uganda Limited okushashura Shiringi 190,000,000 (190 million shillings) omushaija ou ekitongore kyakyebire omu kwezi kwa 7, 2016 kikamugira ngu aine akakooko ka sirimu kandi obwo yabaire atakiine.

Ebihandiiko bya kooti nibyoreka ngu omu kwezi kwa 7, 2016, John Wataka akaza aha ofiisi z’ekitongore kya TASO omuri Jinja kukyebeza akakooko ka siriimu ayekundiire.

Akamanyisibwa ngu akaba aine akakooko ka siriimu kandi ahon’aho akatandikiraho okumira emibazi ya ARVS kumara haihi emyaka 7 okuhisya omu mwaka gwa 2023 obu TASO yarugireyo ekagira ngu omushaija ogu akaba ataine kakooko ka siriimu.

Omu bujurizi bwe, Wataka nakyoreka ngu omwaka gwa 2022, akaza kutunga akasimo ke aka NSSF ahansi y’entebeekanisa ey’abantu abarikutuura n’akakooko ka siriimu. 

Beitu hoona ku yahikireho, NSSF ekakora okukyebera okwetongwire kandi omushaija ogu (Wataka) akashangwa ataine kakooko ka siriimu.

Wataka akagaruka aha TASO, bagaruka bamukyebera bashanga ngu akaba ataine kakooko ka siriimu.

Ahabw’okushanga ngu omu kubanza TASO ekamukyebera yamuhamiza ku aine akakooko ka siriimu, Wataka nagira ngu omukazi we akangana, akafeerwa omurimo, abantu bamuhungaho oteireho n’okutunga okuteganisibwa.

 Omukuhayo encwamu, Omuramuzi wa kooti enkuru omuri Jinja, Joanita Bushara akyorekire ngu ekikorwa eki TASO yakozire ahari Wetaka kikoreka obutafayo.

Omuramuzi aragiire TASO okushashura Wataka Shiringi 190,000,000 ahabw’okuteganisibwa oku bamuhikizeho.

#WestUpdates