Pooriisi nehiiga omushaija ahab’okwita omukazi we akamwezikira- Nebbi.

N’ebya Robert Adiga na Charles Anguma 

NEBBI

Pooriisi omu disiturikiti eya Nebbi eriyo nehiiga omushaija orikugambwa kuba aitsire omukazi we akamuziika omu kyaro ekya Jupazuba omu gomborora eya Erusii omu disiturikiti eya Nebbi.

Omushaija orikumanywa nka Pimundu Michael, naagambwa kuba aitsire omukazi we ou abaire atanire nawe omanyirweho erya Irachan arikumuhotahota amaraka bwanyima y’okugiraho obutaikirizana.

Omutumbi gw’omukazi orikuruga omu kyaro ekya Mahagi omuri Burugwa-Izooba bwa DR Congo gurebirwe omukozi nyomwebazyo guzikirwe omu musiri gw’ebicoori, kiromita 2 kuruga omu maka gaabo.

Ab'eby'okwerinda barikuzikuura omutumbi gw'omukazi ogubaire guzikirwe bwanyima y'okugambwa kuba aitsire iba. PHOTOs: Robert Adiga.

 
Ebyahikireho kuruga omu kucondooza nibyoreka ngu okwezi kumwe enyima, Pimundu Michael ayetsire omukazi we arikugira ngu abaana be barwire aije abareebe kandi omukazi ku ahikireho yashanga abaana batarwire nikwo kugarukana n’omushaija.

Beitu baizire bagiraho obutaikirizana ekirikuteekateekwa kuba nikyo kirugirireho okufa kw’omukazi ogu.

Chartless Opio, Ceeyamaani w’ekyaro ekya Jupazuba naagira ngu omukozi w’emirimo eya rijaarija ayekangire bwanyima y’okureeba enshohera nyingi ziri omu musiri ogu abaire nahiingamu.

Omudumizi wa Pooriisi ya Nebbi, Aminsi Kayondo ajumiriire ekikorwa eki arikugira ngu bariyo nibahiiga omushaija orikuteekateekwaho kuba aitsire omukazi ogu.

Nashaba abantu okuguma nibahababa enshonga z’emihondano y’omu maka omu bwire kwenda ngu Pooriisi ebaase kuzikoraho.

Kayondo ayongyeire yagira ngu Pooriisi ya Nebbi ehandiikire emishango 3 y’obwitsi bw’ekika nk’eki omu bwire bw’ameezi 2.

#WestUpdates