Ow’emyaka 18 ahambire omukaikuru ahabw’enyama y’empunu.

N’ebya Omushaki weitu

OTUKE

Pooriisi omuri Otuke eriyo nehiiga omushaija w’emyaka 18 ahabw’okugambwa kuba ahambire omukaikuru w’emyaka 75 bwanyima y’okumubanja esente ze z’enyama y’empunu ei atwire ah’eibanja ahari 01/01/2024. 

Esente ezi omushaija ogu arikugambwa kuba nabanja omukaikuru ogu ni shiringi 7,000 ez’enyama y’empunu ei yatwire ah’eibanja.

Pooriisi neegira ngu omukaikuru atambwire yaaza omu tauni ya Okolia shaaha nka emwe y’omwabazyo ahi abugaine orikuteekateekwaho omanyirwe nka Oscar Acol.

Omugambirizi wa Pooriisi ahabw’ekyanga ekya North Kyoga, Patrick Jimmy Okema aharwakana naagira ngu Pooriisi eriyo necondooza omushango gw’okuhamba omukaikuru, omutuura w’omu kyaro ekya Alemu omu gomborora eya Olilim. 

Naagira ngu batungire amakuru ngu omukaikuru ku abugaine nyakuteekateekwaho (Oscar Acol) omu muhanda, yamushaba esente ze (Shs 7,000) ez’enyama y’empunu ei yatwire ah’eibanja.

Beitu, omukaikuru abaire ataine esente ezi nikwo omushaihja ogu kumuteera empi z’aha maisho akagwa ahansi atyo akamuhamba. 

Nyakuteekateekwaho (Oscar Acol) okibuzire naagambwa kuba akwatsire omukaikuru akamuniganiga nikwo kumuhamba kifuba n’obu omukaikuru abaire nateera enduru arikweta abantu kumuhwera. 

Okema naagira ngu omukaikuru ahairwe foomu ya Pooriisi kuza kukyebeza ah’eirwariro erya Orum arikwongyeraho ngu bariyo nibahiiga nyakuteekateekwaho.

#WestUpdates