Omushaija oitsire abaana 4 omuri Ggaba kuhozesiibwa omukooti y'abantu kutandika n'Orwokubanza
Gavumenti erangiriire ngu okuhozesa omushaija orikujunaanwa okwiita abaana 4 aha day-care centre omuri Ggaba Kampala nikwija kukorerwa omu kooti y’abantu ahamwanya ogu ekikorwa eki kibeire.
Okello Christopher Onyum orikujunaanwa kuba aitsire abaana 4 omuri Ggaba, Kampala...
N’ebya Omunyamakuru Waitu
KAMPALA:
Gavumenti erangiriire ngu okuhozesa omushaija orikujunaanwa okwiita abaana 4 aha day-care centre omuri Ggaba Kampala nikwija kukorerwa omu kooti y’abantu ahamwanya ogu ekikorwa eki kibeire.
Encwamu egi neijaho bwanyima y’abantu kushaba kuhabaho amazima n’oburingaaniza omukushara omushango ogu ogusaasiize eihanga.
Omushaija ogu, Okello Christopher Onyum, 39, akwatsirwe ahabiro 2.4.2026 bwanyima y’okutaahirira eishomero erya Ggaba Early Childhood Development Program, nikwo kwita abaana bana.
Minisita w’eihanga ow’enshonga z’eminyeto n’abaana, Balaam Barugahara, naagira ngu okuhurira omushango ogu nikwija kukorerwa ah’eishomero eri kutandika na Orwokubanza ebiro 13.4.2026 kutandika na shaaha 3 z’akasheeshe kuhitsya shaaha 10 z’omwabazyo.
Omukweteekateekyera abantu baingi abakubaasa kuhika omukushuta oku, abobushoborozi nibagira ngu nibaija kwikiriza abantu 1,000 bonka omu kooti egi barikugyendera ahabantu abaija kare.