Omushaija najumirira omukazi ahabw’okumukingirana omu Kamina ahabw’enshonga z’omu maka.
Beitu hoona, Byibesho nagira ngu obukenke bukeyongyera obu ashaba ekicweka ky’eitaka kwombekyera omukazi we wa kabiri enju.
Byibesho nagira ngu obwo nibwo bwire obu yashaziremu kushwera omukazi wa kabiri. Photo: Daniel Nsengimana.
N’ebya Omushaki weitu
KISORO
Habarukireho obuteikirizana ahagati y’omushaija n’omukazi we omu disiturikiti eya Kisoro ahi omukazi ahendiire akingiriine omushaija we omuri Kamina.
Benjamin Byibesho, omutuura w’omu kyaro ekya Gisha omu tauni kanso ya Chahafi omuri Kisoro niwe yatungire obuteikirizana n’omukazi we w’okubanza we, Jane Nyirabatutsi.
Byibesho nagira ngu omu kwezi kw’okubanza omu mwaka gwa 2024, omukazi ogu akamukingirana omu kamina kumara edakiika 30 bwanyima y’okugira obuteikirizana omu maka.
Enshonga egi eizire kumanywa ahabiro 20.02.2026 obu abeebembezi b’ekicweka ekyo babaire batebeekaniise orukiiko rw’okugonjoora enshonga za famire egi orubaire omu maka gaabo.
Beitu hoona, orukiiko oru tirubiireho nk’okurubaire rutebeekanisiibwe bwanyima ya Jane Nyirabatutsi kugambwa kuba atoorokire omuka akaza kweshereka omu rutookye bwanyima y’okumanya ngu abeebembezi babaire baizire kubagarukanisa.
Abeebembezi ababaire bayerundaine aha maka g’ababiri aba basigiire bashobairwe batarikubaasa kugumizamu n’orukiiko omukazi atariho.
Okurugirira ahari Byibesho, obuteikirizana obu aine n’omukazi we w’okubanza butwireho kumara emyaka erengire omuri 4. Nagira ngu embeeera ekiija kuguma bwanyima y’okusharamu kushwera omukazi wa Kabiri.
Benjamin Byibesho nagira ngu encwamu ye ey’okushwera omukazi wa kabiri ekiijaho bwanyima y’okugira obuteikirizana omuka ekyamureteire okuguma ayeyinamiriire buri kaire.
Nagira ngu omukazi we w’okubanza akaba atakimuheereza by’okurya kandi akamubinga n’omukishengye kumara obwire buringwa, embeera eyamugyemeseriize kuza kuronda ah’okutuura omu byaro ebindi.
Byibesho nagira ngu obwo nibwo bwire obu yashaziremu kushwera omukazi wa kabiri.
Beitu hoona, Byibesho nagira ngu obukenke bukeyongyera obu ashaba ekicweka ky’eitaka kwombekyera omukazi we wa kabiri enju.
Nagira ngu omukazi we w’okubanza akanga nikwo kwihamu entongane kandi ngu omu kwezi kw’okubanza, omukazi w’okubanza (Jane Nyirabatutsi) akamukingirana omu kamina kumara edakiika 30.
Benjamin Byibesho hati nashaba abeebembezi, Pooriisi, abanyadiini, abatuura n’abandi abarikukwatwaho okutaha omu nshonga zaabo kandi bamwikirize ayombekyere omukazi we wa kabiri enju.
#WestUpdates