Omushaho Kamugisha owa Rwampara asindikirwe omukihome ahabw’okutunga esente omu buhenda biragiro.
Kooti ehuriire ngu Kamugisha na bataahi be omu kwezi kwa kabiri, 2026, bakiiha Sh15,000,000 ahari Severa Nshabohurira omu buhenda biragiro.
Omushaho Kamugisha owa Rwampara asindikirwe omukihome ahabw’okutunga esente omu buhenda biragiro. PHOTO by Annita Atukunda.
N’ebya Annita Atukunda
RWAMPARA
Kooti y’eidaara ry’okubanza omuri Ndeija, Rwampara esindikire aha rumanda Asaph Kamugisha, omushaho ahari Kinoni Health Centre IV aha mushango gw’okutunga esente omu buhenda biragiro.
Kooti ehuriire ngu Kamugisha na bataahi be omu kwezi kwa kabiri, 2026, bakiiha Sh15,000,000 ahari Severa Nshabohurira omu buhenda biragiro barikumuraganisa kumuha omurimo kandi ogubataramuhaire.
Kooti egarukire yaahurira ngu Kamugisha omu kwezi kwa Kabiri, 2026 obwo ari omuri Kinoni, Rwampara nabwo akeiha Sh8,000,000 ahari Syrus Arinaitwe arikumuraganisa kumuha omurimo gwa clinical officer omu disiturikiti eya Rwampara beitu taragumuhiire.
Natasha Mariam, Omugambirizi w’akakiiko aka State House Anti-Corruption Unit nagira ngu Kamugisha akakomwa obu minisita wa gavumenti z’ebyanga, Balaam Barugahara abaire ari omu disiturikiti eya Rwampara omuhururu ye ey’okurwanisa obushomankuzi omu eihanga aharwakabiri ebiro 13.10.2026.
Okukwatwa kwe kukijaho bwanyima y’abantu bamwe kuhayo okwetomboita kwabo aha baraza eyabaire omuri Nyeihanga nikwo aba State House Anti-Corruption Unit bakwatanise n’ekitongore kya Pooriisi ekya CID na ofiisi ya DPP kukwatanisa hamwe kuhisya obu Kamugisha atwirwe omu kooti nyomwabazyo ebiro 20.10.2026.
Arikureebukaho omu maisho g’omuramuzi, Obed Rekyeraho, Kamugisha asindikirwe aha rumanda omu kihome kya Kyamugorani kuhisya ebiro 03.11.2026.
#WestUpdates