Omuhwezi wa Purezidenti wa Malawi afeereire omunyonyi

Tushabe Andrew
Omuhwezi wa mukuru w’eihanga rya Malawi, Saulos Chilima afeereire omuri butandu y’enyonyi; nikwo mukuru w’eihanga yarangirira eriizooba ry’Orwakabiri 11.06.2024, bwanyima y’ababeire nibatooza enyonyi kushanga ebicwanyagurika byayo omukibira ekibeire kiijwiremu oruho.

Enyonyi y’ekinyamahe, ebaire erimu Chilima, 51, hamwe n’abandi 9 ebuzire eizooba ry’Orwokubanza bwanyima y’okuremwa kuteekama omururembo oruri omumatemba g’eihanga orwa Mzuzu ahabw’embeera mbi y’obwire kandi kuhaburwa ku bagaruka omururembo orukuru orwa Lilongwe.

“Ekikoosi ky’abarikutooza hamwe n’abarikuhwera abahonokireho baareeba enyonyi… ecwanyagurikire ehwaireho kandi etaine muntu n’omwe ohonokireho ahabw’okuba ababeire barimu bafeereireho,” Purezidenti wa Malawi Lazarus Chakwera nikwo yaagira eriizooba arikugambira eihanga.“Ebigambo tibirikubaasa kumanyisa obusaasi obu nyine ahabw’eki,” nikwo yaagira.

Bimwe ahabishani ebi abanyamakuru baatunga byaba nibyoreka abanyamahe beemereire ahabicwanyagurika biriho enamba y’enyonyi y’amahe eya Dornier 228-202K.

Ekikoosi eki kyaba nikisherura omukibira kyona ekirikushangwa omumashuuma ga Mzuzu eriizooba bwanyima y’ebitongore by’obushoboorozi kumanya obwaku obu enyonyi egi eheererukire kwohereza n’omwanya ogu ebaire erimu obu ebaire etakabuzire.

Ababeire bari omunyonyi egi bagurukire shaaha 3 z’akasheeshe ez’eshaaha eza Malalwi, barikuza aharufu rw’owaabeire ari Minisita  omuburaingwa burikwingana kiromita 370 omururembo Mzuzu

Owaabeireho muka Purezidenti, Shanil Dzimbiri, nawe abeire ari omunyonyi egi.

#WestUpdates
#RadioWestAt25