Omubiri gw’omushaho obaire abuzire gwashangwa omu Rwizi, Mbarara

N’ebya Fred Turyakira

Obusaasi bwashweka ekyanga kya Mbarara bwanyima ya poorisi omukasheeshe k’eriizooba kuzoora omubiri gwa Judith Kyarisiima, omuzaarisa omukugu, ogwashangwa ahamyegyego y’omugyera gwa Rwizi omururembo Mbarara.

Ekikoosi ky’abantu oteiremu n’abeebembezi b’eirwariro erikuru erya Mbarara Regional Referral, abakozi n’ab’eka y’omugyenzi bakambiika ah’irwariro baijwire okushobangirirwa bwanyima y’okutunga amakuru g’okureebeka kw’omubiri gw’omugyenzi.

Ekikoosi ky’abashaho-kazi, abazaarisa n’abandi bakozi baaza ahakitebe kikuru kya poorisi ya Mbarara, barikwenda kumanya oku omugyenzi yaarugire omumagara g’ensi egi n’okushaba oburingaaniza.

Omugyenzi Judith (buryo) n'omushaija we Justus Nkwatsiibwe (bumosho). PHOTO: Fred Turyakira

Sharon Atuhaire, orikwebembera ekibiina ky’abashaho-kazi n’abazaarisa, yaagira ngu baaza aha poorisi barikushaba oburingaaniza kandi barikwenda ngu poorisi eshendekyereze iba w’omugyenzi erikumutwara omuk’abafu ah’irwariro kuhamya ku omubiri guri ogwa Judith ahabw’okushanga omubiri gwashushuukire ahanyama.

Ogu kandi hoona yayongyera yasiima poorisi ahabw’okukora obutaruha kureebeka ngu batunga omubiri gwa Judith; afire ninga ahuriire.

Abashaho beerundaine ahakashengye k'abafu. PHOTO: Fred Turyakira

Kurugiirira ahari Samson Kasasira, omugambirizi wa poorisi y’ekyanga ekya Rwizi, Kyarisiima Judith ow’emyaka 50 kandi muka Nkwatsiibwe Justus owa Katete omumashuuma g’Orurembo orwa Mbarara, akabura ebiro 02.09.2024.

Omubiri gwe gwatungwa akasheeshe k’eriizooba shaaha 3 omumwanya ogwa Rugazi omurubaju rw’omugyera gwa Rwizi

Omubiri gwatwarwa ah’irwariro rya Mbarara Regional Referral kukyeberwa kwenda kumanya ekuyarugiriireho okufa kwa Judith.

Baingi, kuruga abura, batwire nibagira ngu akaitwa.

Kasasira yaahamiza abakozi b’eirwariro hamwe n’ab’eka y’omugyenzi abaaba bagiire aha poorisi, agumize ngu poorisi eriyoneekora buri kimwe ekirikubaasika kureebeka ngu haabaho oburingaaniza.

Yayongyera yaagira ngu poorisi eine omumikono yaayo abantu 4 abarimu Alex Twesigye, munywani wa Nkwasiibwe, omukozi w’omuka Nyakato Princess na Denis Musimenta omushaho obaire naakora ahaduuka y’emibazi eya Judith erikwetwa UBUNTU Pharmacy omuri Katete omururembo Mbarara

#WestUpdates