Omu Pooriisi ateire amasasi omuserukare yaafeeraho ahabwa Sh2,000 omuri Kagadi

N’ebya Omushaki weitu

KAGADI

Pooriisi omu disiturikiti eya Kagadi eine omukihome kyayo omu Pooriisi waabo orikugambwa kuba ateire amasasi omuserukare wa Uganda akafeeraho omu kishaayi ky’omupiira omu tauni kanso eya Kyaterekera omuri Kagadi.

Nyakuteekateekwaho amanyirwe nka; Umalu Mugisa, 50, orikukora na Kyaterekera Police post, kandi omugyenzi obaire ahairwe akahuumuro ahamurimo amanyirwe nka; Sande Omuhereza Tuhaise, 34, omutuura w’omu kyaro ekya Kitumba A omu tauni kanso eya Kyaterekera.

Omugambirizi wa Pooriisi ahabw’ekyanga ekya Albertine, Julius Allan Hakiza nagira ngu Omuhereza ateeriirwe amasasi omu kavuyo k’okusikasikanira embundu aha kishaayi ky’eishomero erya St Peter’s Catholic Primary School omu wood ya Kitumbi obu tiimu ya Supper Lions FC ebaire neritaana na Lyanda FC omu faayinoro z’ekikopo ekya Go Back to School tournament.

Hakiza nagira ngu nyakuteekateekwaho akwatsirwe kandi omushango gw’obwitsi gumwigwirweho ahari Kagadi Central Police Station ahanamba y’omushango eya KGD/CRB/152/2026. 

Okurugirira ahamugambirizi wa Pooriisi, ekikorwa ky’obwinazi eki kibaireho Orw’okubanza ebiro 09.02.2026 shaaha nka 10 z’omwabazayo kandi Mugisa obaire ateirwe aha kishaayi ekyo n’abandi ba Pooriisi 6 ahabw’okurinda omwanya ogwo atongaine n’omugyenzi (Omuhereza) ahabwa Shilling 2,000 ezibabaire nibashaba kutaaha omu kishaayi kureeba omupiira.

Pooriisi negira ngu okuteera amasasi kutakabireho, tiimu emwe eteebire gooro ekireteire Omuheresz kwenda kutaaha omukishaayi kifuba kuza kujaguza gooro ebaire eteebirwe beitu hoona, atangiirwe omu Pooriisi nikwo ababiri aba kutandika kurwana. 

Omu kurwana okwo, Omuhereza agyerizeho kwenda kwiha embundu ahari Mugisa ekireteire Mugisa okumuteera amasasi akafeeraho.

Omutumbi gwa Omuhereza gutwirwe omu kabafu ah’eirwariro erya Kyaterekera Police Post kwongyera kukyeberwa obwo okucondooza kurikugyenda omu maisho.

#WestUpdates