Nixon na Minaana kuhozesibwa omu kooti enkuru ahaby’okwita Kagezi.

N’ebya Omushaki weitu 

KAMPALA

Omu Pooriisi mukuru SSP Nixon Karuhanga Agasiirwe hamwe n’owabaireho omuserukare w'ekitongore ekya Flying Squard, Abdul Noor Ssemujju a.k.a Minaana abarikujunaanwa okwita omuhwezi w’omutonganiirizi wa gavumenti, Joan Kagezi baasindikirwe omu kooti enkuru kuba niyo yabahozesa.

Omuramuzi wa kooti y’eidaara ry'okubanza, Daphine Ayebare asiindikire abarikujunaanwa omu kooti enkuru bwanyima y’omuhababi mukuru wa gavumenti, Richard Birivumbuka kugambira kooti ngu okucondooza omu mushango ogu kuhwire.

Kagezi akateerwa amasasi agamwitireho ahabiro 30.03.2015 omuri Kiwatule, Kampala obu yabaire aine abaana be omu motoka barikutaaha.

Agasiirwe akakwatwa ahabiro 21.05.2025 bwanyima y'owabaireho omuserukare w'amahe ga UPDF, Daniel Kiwanuka Kisseka owasingisiibwe omushango kugambira kooti ngu omuntu mukuru omu gavumenti owamanyirwe nka Nixson Agasiirwe niwe yabahaire esente z’okwita Kagezi.

Kooti enkuru omuri Kampala ekacwera Kisseka, 43, ekifubiro ky’okukomwa emyaka 35 omu kihome bwanyima y’okwikiriza kuba yayitsire Kagezi.

Ababiri aba nibajunaanwa na John Kibuuka a.k.a Musa, John Massajjage a.k.a Mubiru Brian na Nasur Abdallah Mugonole obwahati abari aha rumanda omu kihome kya Luzira.

#WestUpdates