Mutuhwere enjara yaaza kutwita, titwine n’ahokuraara, abatuura ba Moroto.

N’ebya Olandason Wanyama 

MOROTO

Omwegyemure ogwitsire abantu 4 wiiki ehwaire kandi gukagyemesereza abantu abaingi okuhunga omu maka gwaaho omu disiturikiti eya Moroto gubaasa kureetaho obworo n’enjara omu byaro ebiteganisiibwe.

Omwegyemure ogu gwizireho bwanyima y’enjura y’amaani egwire omu kicweka eki ahabiro 04/11/2023 gukateganisa ebyaro bitari bimwe omu gomborora eya Lotisan omu disiturikiti eya Moroto ekireteire omugyera ogwa Ko'matheniko gwabooga ahabw’enjura egwire kumara eshaaha 6.

Omu njura egi, omukazi afeeriirwe omwana we w’ameezi 6 ou abaire asigire omuka akatwarwa omwegyemure kandi abandi baana be 3 b’oboojo bakiburize.

Okurugiirira aha batuura, batabani b’omukazi ogu 3 abari ahagati y’emyaka 9 na 13 babaire nibateeraho kwambuka omugyera ogwa Ko’matheniko kuza omu maka gaabo haihi n’eishomero erya Atedeoi Primary School nikwo amaizi kubakiza amaani gakabatwara.

Omwijuzo gw’amaizi gusisire emisiri y’abantu, amaka g’abantu, emyenda, ebitanda by’omunju n’ebindi.

Ceeyamaani w’egomborora eya Lotisan, Robert Akiki Adupa, ahamize ngu abantu 4 bafeeriire omu mwegyemure ogu ogurestirweho enjura y’amaani.

Adupa nagamba ebyaro ebikirizeyo kuteganisibwa nka; Akwapua, Lokapel, Lokali na Napoo eby’omu muruka ogwa Lokisilei. Ekyaro ekindi ekyateganisiibwe ni Kidepo omu muruka gwa Mogosi omu gomborora eya Lotisan.

Nagira ngu omwegyemure ogu guretsirweho enjara y’amaani omu byaro ebiteganisiibwe arikwongyeraho ngu amaka amaingi hati nigamara ebiro 2 gataine kigariire.

Adupa nashaba gavumenti okutaho oburyo ekatungire abantu aba ah’okuraara erikubaheereza entundubaare arikwongyeraho ngu kigumire kuza kutema ebinyansi omu kishaka n’okutunga ebikondo by’okutaho obuju bw’okuraramu 

Nayongyeraho ngu abaana hamwe n’abakazi nibo bakirizeyo kutegansibwa empinduka y’obwire arikugira ngu ku kihikire omu kyanga ekya Karamoja kyarenga.

#WestUpdates