Museveni aikiriize owabaireho MP Onapito okuziikwa gavumenti.

N’ebya Omushaki weitu

Purezidenti Yoweri Museveni aikiriize owabaireho Omuny’ishengyero owa Amuria kandi Omunyamakuru, Francis Ekomoloit Onapito okuziikwa gavumenti.

Onapito, 58, orikumanywa munonga nka 'Ona' afiire omukasheeshe k’orwakataano ebiro 27.09.2024 omuri Kampala.

Onapito nabwo akaakoraho nka omuhwezi w’orikukurira amakuru ga Purezidenti.

Milly Babirye Babalanda, Minisita w’enshonga z’obwa Purezidenti arangiriire egi eya Purezidenti ey’okuziika Onapito omukitiinisa kandi akaziikwa gavumenti.

Omukihandiiko ekishohoziibwe, Babalanda naagira ngu akakiiko k’eihanga akarikutebeekanisa okuziika Onapito nikeija kukoragana na Paramenti kutebeekanisa puroguraamu y’okuziika Onapito.

Purezidenti nayikiriza omuntu okuziikwa gavumenti yaaba akoriire gye eihanga kandi gavumenti niyo erikushashura esente zoona ezirikukoresibwa omuntebeekanisa yoona ey’okuziika.

Ahu afeereire, Onapito abaire ari boodi ceeyamaani wa Nile Breweries Limited, omwanya ogu atwiremu kuruga omu kwezi kwa 8, 2023.

#WestUpdates