“Mumpwere, omushaija yamara emyaka 2 abuzire” – Kemigisha

“Mumpwere, omushaija yamara emyaka 2 abuzire” – Kemigisha

N’ebya Christopher Ahimbisibwe

ISINGIRO:

Kemigisha Immaculate, kuruga omuri Rwetango omu disiturikiti ya Isingiro obwahati ariyo ashobangirirwe n’abaana babiri abu omushaija we Tumusiime Hannington yamusigire akamara akabura.

Obwahati yahiika emyaka ebiri kwiha iba agyenda kandi ab’eka tibaribarikumanya ekyaresiire Tumisiime nabura.

Tuhiikire omu maka ga Yowasi Bamanyire agarikushangwa omukyaro kya Rwenyaga omu gomborora ya Rwetango omu disiturikiti ya Isingiro.

Oku niho tushangire Kemigisha Immaculate ashobangirirwe n’abaana be babiri abu omushaija we Tumusiime yamusigire akabura. 

Tumusiime Hannington owabuzire

Kemigisha naagira ngu omushaija we akimuka omukasheeshe nikwo kwetereza boona barikuza  omu mbaga ya munywani waabo eyabaire eri omuri Katojo Rwenjeru.

Kwonka kubahikiire omu mbaga tibaragarukiire kumureeba, nikwo kutekateeka ngu hariho ahu yaaza. Kuruga obwe omu 2021 n’okuhisya nahati, tarikumanya ahu omushaija we yaagiire ninga ekyaretiire nagyenda.

Yowasi Bamanyire ishe wa Tumusiime, naagira ngu omutabani akazaarwa arigye omukwezi kwa kaana omu omwaka gwa 1980 kandi yashoma yahiika omu S.4 nikwo kutandika kwekoresa. 

Bwanyima akaija yamushwerera omu mwaka gwa 2019 ahu omukazi we Kemigisha abaire yamuhisyamu abaana babiri. 

Abeeka ya Yowasi n’obu bagyerizeho kuhunama barikutekateeka ngu omwana waabo Tumisiime abaasa kuba yagiire kukora obundi naija kwija, kwonka kubarebiire yahiika emyaka ebiri batakamurebiire batandiika kugiira obwoba bwingi ngu omwana waabo abaasa kuba atakiriho. 

Obwahati abeeka egi bariyo bashobangirirwe ahabw’okuba tibarikumanya yaaba mutabani waabo yafiire ninga akiriho. 

Niboreka oku bakiine okwebuza aha mitima yaabo ekyaretiire Tumusiime naruga omuka atagambire kandi yabaire ataine burwaire bwona aha mubiri gwe obwakubasa kuba bwamugyemeserize kuruga omuka. 

Owakuba namanya Tumusiime Hannington ahu ari nabaasa kuhwere ab’eka egi obwe arikukoresa anamba z’esiimu ezi; 0771664660 hamwe na 0701738588.

#WestUpdates