Eishengyero ryayinamira abafeereire omu kutaahirirwa kwa ADF – Kasese

Eishengyero ryayinamira abafeereire omu kutaahirirwa kwa ADF – Kasese

N’ebya Umaru Kashaka

Eishengyero eriizooba ryayinamira abantu na munonga abeegi abafeereire omu kutaahirira kw’abahekyera ba ADF ah’eishomero erya Mpondwe- Lhubiriha SS omu disiturikiti ya Kasese.

Abantu 42 aharimu abeegi 37 nibagambwa kuba baitiirwe omu kutaahirira ah’eishomero eri, haihi n’ensharo ya Uganda na DR Congo aharwakataano ebiro 16/6/2023

Sipiika w’eishengyero, Anita Among owaaba akuriire orushutamo rw’eishengyero eihangwe eri, yaajumirira ekikorwa eki ky’obwinazi ahabaana abataine mushango.

Sipiika Among yaaragiira Minisita w’eby’okwerinda n’ow’enshonga z’eby’amahe kushoboorora eishengyero ekikozirwe n’okucondooza ahi kwahika.

Enganzi y’eihanga, Robinah Nabbanja yaagira ngu ekibaire Kasese n’eky’obusaasi kandi yaahamya ngu Minisita w’eby’obwegyese naija kuhayo ekihandiiko omu eishengyero aha kutaahirira oku.

Amahanga n’ebitongore by’amahanga omunsi nka UNICEF birugireyo kujumiirira okutaahirirwa oku obwo barikushaba abaheekyera kurekura abeegi abu baburizeho.

Okutaahirira oku kweshushanirize okwabaireho emyaka 25 enyimaho obu abahekyera ba ADF bataahirira eitendekyero erya Kichwamba Technical Institute omukwamukaaga 1998 bakaita abeegi 80 bakabuzaho n’abandi baingi.

#WestUpdates