Besigye nayenda kooti ebingye eky’okuhozesa abajurizi omukihama omushango gwabo.
Besigye nagira ngu aine obugabe bw’okuhurira omushango gwe omu maisho g’abantu nk’oku engyenderwaho erikugamba.
Besigye na mutaahi we Hajji Obeid Lutale nibajunaanwa hamwe omushango gw’okurya omu eihanga ryabo orukwe n’omuserukare wa UPDF, Capt Denis Oola.
N’ebya Omushaki Weitu
KAMPALA
Owayetsimbireho ahabwa Purezidenti emirundi 4 atarikurabamu, Col. Dr. Kizza Besigye hamwe na mutaahi we ou arikujunaanwa nawe bashabire kooti okwanga okushaba kw’ab’orubaju oruhababi okw’okushereka ebirikukwata aha bajurizi hamwe n’okuhozesa abajurizi abo omu kihama omu mushango gwabo ogw’okurya omu eihanga ryabo orukwe.
Besigye na mutaahi we Hajji Obeid Lutale nibajunaanwa hamwe omushango gw’okurya omu eihanga ryabo orukwe n’omuserukare wa UPDF, Capt Denis Oola.
Ekifubiro ekirikukirayo kuheebwa omu mushango ogu n’okwitwa.
Omub ujurizi obwanjwirwe omu maisho g’omuramuzi Emmanuel Baguma owa kooti enkuru eya Criminal Divisions nyomwabazyo, Besigye agizire ngu okuhozesa abajurizi aba omu kihama n’okwensa kwima ab’orubaju orwabakitabarizibwa omugisha gw’okutunga obujurizi oteireho n’okumara amaani entebeekanisa ez’okuhurira omushango ogu.
Besigye nagira ngu aine obugabe bw’okuhurira omushango gwe omu maisho g’abantu nk’oku engyenderwaho erikugamba.
Besigye abaire nagarukamu okushaba kwab’orubaju oruhababi ahi barikwenda kushereka ebirikukwata aha bajurizi 6 n’okubahozesa omu kihama omu mushango ogu barikugira ngu nikibaasa kuta amagara gaabo g’abajurizi aba omu kabi.
Nayongyeraho ngu orubaju oruhababi tiruretsire obujurizi burikwemarira oburikworeka ngu hariho okutinisiriza abajurizi aba arikugira ngu oku kwona n’okutebereza.
#WestUpdates