Balaam araganiise kuhwera abashuubuzi b’embaazo ezookiibwe omuriro – Mbarara City

Balaam araganiise kuhwera abashuubuzi b’embaazo ezookiibwe omuriro – Mbarara City

N’ebya Ssengendo Abdulkarim

Minisita wa Gavumenti z’ebyanga, Balaam Barugahara araganiise obuhwezi bw’abashuubuzi abafeereirwe embaaho zaabo ezookiibwe omuriro gw’ekiro ahari Victor Bwana Road omururembo Mbarara

Barugahara obaire ari omururembo Mbarara nyomwebazyo ebiro 04.08.2026, obwo ari omuhururu y’okworeka enkozesa ya sente, ataayayeire omwnya ogu kureeba okusiisikara okuhireho hamwe n’okugaaniiraho n’abashuubuzi.

Minisita aragiire ab’obushoboorozi ahakanso y’orurembo rwa Mbarara kutunga omwanya gw’okutaho abashuubuzi b’ahanguuto aho n’aho.

Omuriro gw’amaani gukakwatsire akatare k’embaaho omukasheeshe ka nyomwebazyo nikwo kucwekyereza ebintu n’ebikoresa ebirimu obuhumbi bw’empiiha

Poorisi batandiikireho n’okucondooza omubukomooko bw’omuriro, okurugiirira ahamugambirizi wa poorisi ey’ekyanga ekya Rwizi, Samson Kasasira.

Minisita ahigire abatuura b’orurembo Mbarara kushagika ehururu ye y’okurwanisa obushomankuzi

Omurutaayaayo rwe, minisita kandi hoona aragiire okukwata kwa bamwe omubakungu b’orurembo Mbarara abarimu Justine Barekye, omuhwezi we Simon Ejua abarikugambwa kuba bafeerereize gavumenti sente kandi ezindi bakazikoresa kubi.

Aba bahairweyo omumikono ya poorisi kutayo ebihandiiko kandi baragiirwe kuruga omuntebe zaabo obwo kuhisya ahi okucondooza kuraahwere.

Burugahara kandi nabwo aragiire ku habaho okucondooza omu sente ezaakoresiibwe omukuhunduuza orutindo rwa Katete. Kurugiirira ahari minisita, sente zirikuhika 363,000,000 ezaahwereire ahakuhunduuza orutindo tizirikworeka mutindo gw’omurimo ogurikureebwa aharutindo oru.

Minisita ayongyeire yaaraganisa ab’omururembo Mbarara ku gavumenti erikwija kukora aharutindo omunshumi nkye.

“Naareeba omuringo ogu orutindo rurimu. Nirwekorera munonga; orutindo nirutwara enkumi n’enkumi z’abantu. Nangwa ninyija n’okwijusya Purezidenti… ekizibu nikiija kukorwaho,” nikwo minisita agizire.

Obu abaire ari omukatare aka Central Market, minisita aragiire okutaho akaruuru ak'abeebembezi abasya bwanyima y’abashuubuzi kwetomboitira ebishare by’amashanyarazi, amaizi hamwe n’enshonga ezindi.

Kandi nabwo Minisita aragiire abashuubuzi abaine empiiha nyingi kuruga omukatare aka, nikwo bahe omugisha abo ab’entaasya nkye. Barugahara ashoboroire ngu Purezidenti Yoweri Museveni akombeka akatare aka ngu kakoresibwe abashuubuzi aba buriijo n’ekigyendererwa ky’okubatangiza okushashura ebishare ebiri ahaiguru ebirikubateebwaho abagaiga.

“Ku oraabe noomanya ngu oine enju z’okupangisa, obwire bwawe bwahwayo eriizooba, Purezidenti Museveni akombekyera, obutare obu, abashuubuzi ab’entaasya nkye beitu batari bagaiga,”

Abebembezi b’orurembo rwa Mbarara beebembeirwe meeya Robert Mugabe Kakyebezi n’omuny’eishengyero omukazi ow’orurembo, Charity Kibaaju, bahimbiise ehururu ya minisita, na munonga okurwanisa oburi bw’enguzi.

“Yebare, ow’ekitiinisa Minisita, ahabw’okutiiza eiraka ryawe omukurwanisa oburi bw’enguzi. Nitusiima turikwiha ahamutima, omuringo ogu oriyo nooshoboorora enshonga nkuru egi omu ihanga,” nikwo Kakyebezi agizire.

#WestUpdates