Abibiirweho obusinguzi bwanyu nimwija kutunga oburinganiza- Purezidenti ahamiize aba NRM.

N’ebya Omushaki weitu

KAMPALA

Purezidenti Yoweri Museveni nahamiza abetsimbireho boona omu kigombe kya NRM abarikugambwa kuba bibiirweho obusinguzi bwabo omu karuuru k’ekigombe ak’okutoorana abakwatsi b’ebendera ahantebe z’omuny’eishengyero omu eihanga akateirwe ebiro 17.07.2025 ngu nibeija kutunga oburinganiza.

Omu kihandiiko eki ateire aha mukura gwe ogwa X, Purezidenti Museveni nabwo ori ceeyamaani wa NRM omu eihanga naagira ngu obuhame hamwe n’obujurizi nibyo birikwija kugonjora enshonga z'okwiba akaruuru.

Purezidenti naagira ngu okwiba akaruuru okurikugambwa kuba kubaire omu kuteera akaruuru ka NRM akateirwe Orwakana ebiro 17.07.2025 okubire kurimu okuhindura ebyarugire omu kuteera akaruuru aka (results), okucupura za regista n’ebindi n’omushango.

Museveni nakyoreka ngu ebitongore nk’ekya ISO n’ekya CID byaherize kuhweraho omu kukwata enkozi z’ebihagaro n’okubataho emishango.

Purezidenti nashaba mukuru w’akakiiko k’eby’oburuuru aka NRM Dr. Tanga Odoi okurangiirira ‘results’ ezihikire na munonga nk’oku akaruuru aka kabaire kari ak’okwemerera omu mugongo g’'omuntu oyetsimbire omu eihangwe omushana gurikujwa, abantu barikureeba ekirikugyenda omu maisho.

Ekigombe ekya NRM nikija kuteeza akaruuru akandi nyencakare ak’okutoorana abakwatsi b’ebendera ahantebe y’aba ceeyamaani ba disiturikiti, meeya, ba Kansara ba disiturikiti naaba Kansara b’omundembo. 

Akaruuru aka nikeija kuteerwa ebiro 24.07.2025.

#WestUpdates