Abashuubuzi b'aha mihanda omuri Kampala bahairwe ebiro 14 kuruga omu myanya egyo.

N’ebya Omushaki weitu

KAMPALA

Gavumenti kurabira omu minisiture y’enshonga za Kampala n’emyanya egiheeriire hamwe n’ekitongore ekya KCCA ehaire abashuubuzi ebiro 14 kuba barugire ahanguuto z’omuri Kampala kitari ekyo nibeija kubingwaho kifuba.

Arikugambaho n’abanyamakuru omuri Kampala nyomwabazyo ebiro 05.02.2026, Minisita w’enshonga za Kampala, Hajjati Minsa Kabanda nagira ngu nk’oku siizoni y’akaruuru ehwaire, obu nibwo bwire obw’okugaruza buri kimwe omu buteeka.

Kabanda nagira ngu Kampala hati egiire omu kicweka ky’okuta omunkora ebiragiro byona eby’orurembo kureeba ngu bateereza ekicweka ekyo.

Nashoborora ngu ameezi agahingwire, okuta omunkora ebiragiro kubaire kwemereziibwemu ahabw’okwenda kuheereza abantu omugisha kwejumbira omu kuteera akaruuru arikwongyeraho ngu hati ebiragiro byine kuteebwa omunkora nk’oku oburuuru buhwire.

Benon Moses Kigenyi, Omuhwezi wa mukuru wa KCCA nakyoreka ngu baronzire emyanya 2,520 ey’okukoreramu omu butare 9 aha butare 15 obu KCCA eineho obujunanizibwa omuri za divijoni zoona ez’omuri Kampala. 

Kigenyi nagira ngu abashuubuzi b’aha mihanda babatebeekanisiize kukorera omu myanya egyo 2,520 eteirweho.

#WestUpdates