Abaserukare 4 bateirweho omushango gw’okukwata eijaga amajuta.

N’ebya Omushaki weitu

KAMPALA

Abaserukare 4 bakuru ba UPDF abarimu Brig. Gen. James Barigye Ruheesi, bateirweho omushango kandi basindikwa omu kihome ky’amahe ekya Makindye Military Barracks ahabw'okukwata eijaga lita 270,000 z’amajuta obu babaire nibakora ekikwekweto.

Ruheesi, 60, owabaireho omuduumizi w’enkambi eya Uganda Rapid Deployment Capability n’omwe omu basindikirwe omu kihome hamwe na Col. David Ocitti Kidega, 52.

Abandi ni Maj. Innocent Kikongi Mugumya, 41, owabaire nakora n’ekitongore ekya Uganda Rapid Deployment Capability na Capt. Kenneth Labwon Kinyera, 37, owabaire nakora na UPDF Joint Staff Health Services nk’omuguzi w’ebintu.

Kooti y’amahe omuri Makindye ebaire ekuriirwe Brig. Gen. Richard Tukachungurwa, esindikire abaserukare bana omu kihome agumize ngu bakakwata eijaga amajuta bayebembeza ebyetengo byabo okusinga ekikwekweto ekibabaire bariho.

Abaserukare aba nibagambwa kuba baasiisire amajuta aga ahagati ya y’okwezi kwa 7, 2022 n’okwa 12, 2023 omu rurembo orwa Kampala na Jinja kandi lita 270,000 z’amajuta nizo zasiisirwe.

Abaserukare aba behakiine omushango kandi basindikirwe omu kihome aha rumanda.

#WestUpdates